¹to sab log mil kar paanee kay darvaazay kay chauk men jama ho gaay. unhon nay shareeat kay aalim azra say darakhwaast kee ki vah shareeat lay aaen jo rabb nay moosa kee maarifat israaeelee qaum ko day dee thee. ²chunaanchay azra nay haazireen kay saamnay shareeat kee tilaavat kee. saatven maheenay ka pahela din ^[a] 8 aktoobar. tha. na sirf mard balki aurten aur shareeat kee baaten samajhnay kay qaabil tamaam bachchay bhee jama huay thay. ³subah-saveray say lay kar dopaher tak azra paanee kay darvaazay kay chauk men padhta raha, aur tamaam jamaaat dhyaan say shareeat kee baaten suntee rahee.

⁴azra lakdee kay ek chabootray par khada tha jo khaaskar is mauqay kay liyay banaaya gaya tha. us kay daaen haath mattitiyaah, sama, anaayaah, ooriyaah, khilaqiyaah aur maasiyaah khaday thay. us kay baaen haath fidaayaah, meesaael, malkiyaah, haashoom, hasbaddaana, zakariyaah aur masullaam khaday thay.

⁵choonki azra oonchee jagah par khada tha is liyay vah sab ko nazar aaya. chunaanchay jab us nay kitaab ko khol diya to sab log khaday ho gaay. ⁶azra nay rabb azeem khuda kee sitaaish kee, aur sab nay apnay haath utha kar javaab men kaha, “aameen, aameen.” phir unhon nay jhuk kar rabb ko sijda kiya.

⁷kuchh laavee haazir thay jinhon nay logon kay liyay shareeat kee tashreeh kee. un kay naam yashooa, baanee, saribiyaah, yameen, aqqoob, sabbtee, hoodiyaah, maasiyaah, qaleeta, azariyaah, yoozbad, hanaan aur filaayaah thay. haazireen ab tak khaday thay. ⁸shareeat kee tilaavat kay saath saath mazkoora laavee qadam-ba-qadam us kee tashreeh yoon kartay gaay ki log usay achchhee tarah samajh sakay.

⁹shareeat kee baaten sun sun kar vah ronay lagay. lekin nahemiyaah gavarnar, shareeat kay aalim azra imaam aur shareeat kee tashreeh karnay vaalay laaviyon nay unhen tasallee day kar kaha, “udaas na hon aur mat roen! aaj rabb aap kay khuda kay liyay makhsoos-o-muqaddas eed hai. ¹⁰ab jaaen, umda khaana kha kar aur peenay kee meethee cheezen pee kar khushee manaaen. jo apnay liyay kuchh tayyaar na kar saken unhen apnee khushee men shareek karen. yah din hamaaray rabb kay liyay makhsoos-o-muqaddas hai. udaas na hon, kyoonki rabb kee khushee aap kee panaahgaah hai.”

¹¹laaviyon nay bhee tamaam logon ko sukoon dila kar kaha, “udaas na hon, kyoonki yah din rabb kay liyay makhsoos-o-muqaddas hai.”

¹²phir sab apnay apnay ghar chalay gaay. vahaan unhon nay badee khushee say kha pee kar jashn manaaya. saath saath unhon nay doosron ko bhee apnee khushee men shareek kiya. un kee badee khushee ka sabab yah tha ki ab unhen un baaton kee samajh aaee thee jo unhen sunaaee gaee theen.

jhompadiyon kee eed

¹³aglay din ^[b] 9 aktoobar. khaandaanee sarparast, imaam aur laavee dubaara shareeat kay aalim azra kay paas jama huay taaki shareeat kee mazeed taaleem paaen. ¹⁴jab vah shareeat ka mutaal’a kar rahay thay to unhen pata chala ki rabb nay moosa kee maarifat hukm diya tha ki israaeelee saatven maheenay kee eed kay dauraan jhompadiyon men rahen. ¹⁵chunaanchay unhon nay yarooshalam aur baaqee tamaam shaheron men elaan kiya, “pahaadon par say zaitoon, aas ^[c] mayratalay. , khajoor aur baaqee saayaadaar darakhton kee shaakhen tod kar apnay ghar lay jaaen. vahaan un say jhompadiyaan banaaen, jis tarah shareeat nay hidaayat dee hai.”

¹⁶logon nay aisa hee kiya. vah gharon say niklay aur darakhton kee shaakhen tod kar lay aaay. un say unhon nay apnay gharon kee chhaton par aur sahenon men jhompadiyaan bana leen. baaz nay apnee jhompadiyon ko rabb kay ghar kay sahenon, paanee kay darvaazay kay chauk aur ifraaeem kay darvaazay kay chauk men bhee banaaya. ¹⁷jitnay bhee jilaavatanee say vaapas aaay thay vah sab jhompadiyaan bana kar un men rahenay lagay. yashooa bin noon kay zamaanay say lay kar us vaqt tak yah eed is tarah naheen manaaee gaee thee. sab nihaayat hee khush thay. ¹⁸eed kay har din azra nay allaah kee shareeat kee tilaavat kee. saat din israaeeliyon nay eed manaaee, aur aathven din sab log ijtima kay liyay ikatthay huay, bilkul un hidaayaat kay mutaabiq jo shareeat men dee gaee hain.