Nahemiyaah 9
israaeelee apnay gunaahon ka iqraar kartay hain
1usee maheenay kay 24ven din [a] 31 aktoobar. israaeelee roza rakhnay kay liyay jama huay. taat kay libaas pahenay huay aur sar par khaak daal kar vah yarooshalam aaay. 2ab vah tamaam ghairyahoodiyon say alag ho kar un gunaahon ka iqraar karnay kay liyay haazir huay jo un say aur un kay baapdaada say sarzad huay thay. 3teen ghantay vah khaday rahay, aur us dauraan rabb un kay khuda kee shareeat kee tilaavat kee gaee. phir vah rabb apnay khuda kay saamnay munh kay bal jhuk kar mazeed teen ghantay apnay gunaahon ka iqraar kartay rahay.
4yashooa, baanee, qadameeel, sabaniyaah, bunnee, saribiyaah, baanee aur kanaanee jo laavee thay ek chabootray par khaday huay aur buland aavaaz say rabb apnay khuda say dua kee.
5phir yashooa, qadameeel, baanee, hasabniyaah, saribiyaah, hoodiyaah, sabaniyaah aur fatahiyaah jo laavee thay bol uthay, “khaday ho kar rabb apnay khuda kee jo azal say abad tak hai sitaaish karen!”
unhon dua kee,
“teray jalaalee naam kee tamjeed ho, jo har mubaarakabaadee aur taareef say kaheen badh kar hai. 6ai rabb, too hee vaahid khuda hai! too nay aasmaan ko ek siray say doosray siray tak us kay lashkar samet khalaq kiya. zameen aur jo kuchh us par hai, samundar aur jo kuchh us men hai sab kuchh too hee nay banaaya hai. too nay sab ko zindagee bakhshee hai, aur aasmaanee lashkar tujhay sijda karta hai.
7too hee rabb aur vah khuda hai jis nay abraam ko chun liya aur kasdiyon kay shaher oor say baahar la kar ibraaheem ka naam rakha. 8too nay us ka dil vafaadaar paaya aur us say ahd baandh kar vaada kiya, ‘main teree aulaad ko kan’aaniyon, hittiyon, amoriyon, farizziyon, yaboosiyon aur jirjaasiyon ka mulk ata karoonga.’ aur too apnay vaaday par poora utra, kyoonki too qaabil-ay-etimaad aur aadil hai.
9too nay hamaaray baapdaada kay misr men buray haal par dhyaan diya, aur baher-ay-qulzum kay kinaaray par madad kay liyay un kee cheekhen suneen. 10too nay ilaahee nishaanon aur mojizon say firaaun, us kay afsaron aur us kay mulk kee qaum ko saza dee, kyoonki too jaanta tha ki misree hamaaray baapdaada say kaisa gustaakhaana sulook kartay rahay hain. yoon tera naam mashhoor hua aur aaj tak yaad raha hai. 11qaum kay dekhtay dekhtay too nay samundar ko do hisson men taqseem kar diya, aur vah khushk zameen par chal kar us men say guzar sakay. lekin un ka taaqqub karnay vaalon ko too nay mutlaatim paanee men phaink diya, aur vah pattharon kee tarah samundar kee gaheraaiyon men doob gaay.
12din kay vaqt too nay baadal kay satoon say aur raat kay vaqt aag kay satoon say apnee qaum kee raahanumaaee kee. yoon vah raasta andheray men bhee raushan raha jis par unhen chalna tha. 13too koh-ay-seena par utar aaya aur aasmaan say un say hamkalaam hua. too nay unhen saaf hidaayaat aur qaabil-ay-etimaad ahkaam diay, aisay qavaaid jo achchhay hain. 14too nay unhen sabat kay din kay baaray men aagaah kiya, us din kay baaray men jo teray liyay makhsoos-o-muqaddas hai. apnay khaadim moosa kee maarifat too nay unhen ahkaam aur hidaayaat deen. 15jab vah bhookay thay to too nay unhen aasmaan say rotee khilaaee, aur jab piyaasay thay to too nay unhen chataan say paanee pilaaya. too nay hukm diya, ‘jaao, mulk men daakhil ho kar us par qabza kar lo, kyoonki main nay haath utha kar qasam khaaee hai ki tumhen yah mulk doonga.’
16afsos, hamaaray baapdaada maghroor aur ziddee ho gaay. vah teray ahkaam kay taabay na rahay. 17unhon nay teree sunnay say inkaar kiya aur vah mojizaat yaad na rakhay jo too nay un kay darmiyaan kiay thay. vah yahaan tak ad gaay ki unhon nay ek raahanuma ko muqarrar kiya jo unhen misr kee ghulaamee men vaapas lay jaaay. lekin too muaaf karnay vaala khuda hai jo meharbaan aur raheem, tahemmul aur shafqat say bharpoor hai. too nay unhen tark na kiya, 18us vaqt bhee naheen jab unhon nay apnay liyay sonay ka bachhda dhaal kar kaha, ‘yah tera khuda hai jo tujhay misr say nikaal laaya.’ is qism ka sanjeeda kufr vah baktay rahay. 19lekin too bahut rahemdil hai, is liyay too nay unhen registaan men na chhoda. din kay vaqt baadal ka satoon un kee raahanumaaee karta raha, aur raat kay vaqt aag ka satoon vah raasta raushan karta raha jis par unhen chalna tha. 20na sirf yah balki too nay unhen apna nek rooh ata kiya jo unhen taaleem day. jab unhen bhook aur piyaas thee to too unhen mann khilaanay aur paanee pilaanay say baaz na aaya. 21chaalees saal vah registaan men phirtay rahay, aur us pooray arsay men too un kee zarooriyaat ko poora karta raha. unhen koee bhee kamee naheen thee. na un kay kapday ghis kar phatay aur na un kay paaon soojay.
22too nay mamaalik aur qaumen un kay havaalay kar deen, mukhtalif ilaaqay yakay baad deegray un kay qabzay men aaay. yoon vah seehon baadshaah kay mulk hasbon aur oj baadshaah kay mulk basan par fatah pa sakay. 23un kee aulaad teree marzee say aasmaan par kay sitaaron jaisee beshumaar huee, aur too unhen us mulk men laaya jis ka vaada too nay un kay baapdaada say kiya tha. 24vah mulk men daakhil ho kar us kay maalik ban gaay. too nay kan’aan kay baashindon ko un kay aagay aagay zer kar diya. mulk kay baadshaah aur qaumen un kay qabzay men a gaeen, aur vah apnee marzee kay mutaabiq un say nipat sakay. 25qil’aaband shaher aur zarkhez zameenen teree qaum kay qaaboo men a gaeen, neez har qism kee achchhee cheezon say bharay ghar, tayyaarshuda hauz, angoor kay baagh aur kasrat kay zaitoon aur deegar phaldaar darakht. vah jee bhar kar khaana kha kar motay ho gaay aur teree barkaton say lutf’andoz hotay rahay.
26is kay baavujood vah taabay na rahay balki sarkash huay. unhon nay apna munh teree shareeat say pher liya. aur jab teray nabee unhen samjha samjha kar teray paas vaapas laana chaahatay thay to unhon nay baday kufr bak kar unhen qatl kar diya. 27yah dekh kar too nay unhen un kay dushmanon kay havaalay kar diya jo unhen tang kartay rahay. jab vah museebat men phans gaay to vah cheekhen maar maar kar tujh say faryaad karnay lagay. aur too nay aasmaan par say un kee sunee. bada taras kha kar too nay un kay paas aisay logon ko bhej diya jinhon nay unhen dushmanon kay haath say chhudaaya. 28lekin joon hee israaeeliyon ko sukoon milta vah dubaara aisee harkaten karnay lagtay jo tujhay naapsand theen. nateejay men too unhen dubaara un kay dushman kay haath men chhod deta. jab vah un kee hukoomat kay tahet pisnay lagtay to vah ek baar phir chilla chilla kar tujh say iltimaas karnay lagtay. is baar bhee too aasmaan par say un kee sunta. haan, too itna rahemdil hai ki too unhen baar baar chhutkaara deta raha! 29too unhen samjhaata raha taaki vah dubaara teree shareeat kee taraf rujoo karen, lekin vah maghroor thay aur teray ahkaam kay taabay na huay. unhon nay teree hidaayaat kee khilaafvarzee kee, haalaanki in hee par chalnay say insaan ko zindagee haasil hotee hai. lekin unhon nay parva na kee balki apna munh tujh say pher kar ad gaay aur sunnay kay liyay tayyaar na huay.
30un kee harkaton kay baavujood too bahut saalon tak sabr karta raha. tera rooh unhen nabiyon kay zareeay samjhaata raha, lekin unhon nay dhyaan na diya. tab too nay unhen ghairqaumon kay havaalay kar diya. 31taaham tera rahem say bhara dil unhen tark karkay tabaah naheen karna chaahata tha. too kitna meharbaan aur raheem khuda hai!
32ai hamaaray khuda, ai azeem, qavee aur maheeb khuda jo apna ahd aur apnee shafqat qaaim rakhta hai, is vaqt hamaaree museebat par dhyaan day aur usay kam na samajh! kyoonki hamaaray baadshaah, buzurg, imaam aur nabee balki hamaaray baapdaada aur pooree qaum asooree baadshaahon kay pahelay hamlon say lay kar aaj tak sakht museebat bardaasht kartay rahay hain. 33haqeeqat to yah hai ki jo bhee museebat ham par aaee hai us men too raast saabit hua hai. too vafaadaar raha hai, go ham qusoorvaar thaheray hain. 34hamaaray baadshaah aur buzurg, hamaaray imaam aur baapdaada, un sab nay teree shareeat kee pairvee na kee. jo ahkaam aur tambeeh too nay unhen dee us par unhon nay dhyaan hee na diya. 35too nay unhen un kee apnee baadshaahee, kasrat kee achchhee cheezon aur ek vasee aur zarkhez mulk say navaaza tha. to bhee vah teree khidmat karnay kay liyay tayyaar na thay aur apnee ghalat raahon say baaz na aaay.
36is ka anjaam yah hua hai ki aaj ham us mulk men ghulaam hain jo too nay hamaaray baapdaada ko ata kiya tha taaki vah us kee paidaavaar aur daulat say lutf’andoz ho jaaen. 37mulk kee vaafir paidaavaar un baadshaahon tak pahunchtee hai jinhen too nay hamaaray gunaahon kee vajah say ham par muqarrar kiya hai. ab vahee ham par aur hamaaray maveshiyon par hukoomat kartay hain. un hee kee marzee chaltee hai. chunaanchay ham badee museebat men phansay hain.
qaum ka ahdanaamaa
38yah tamaam baaten madd-ay-nazar rakh kar ham ahed baandh kar usay qalamband kar rahay hain. hamaaray buzurg, laavee aur imaam dastakhat karkay ahdanaamay par muhar laga rahay hain.”