Amsaal 4

baap kee naseehat

¹ai beto, baap kee naseehat suno, dhyaan do taaki tum seekh kar samajh haasil kar sako. ²main tumhen achchhee taaleem deta hoon, is liyay meree hidaayat ko tark na karo. ³main abhee apnay baap kay ghar men naazuk ladka tha, apnee maan ka vaahid bachcha, ⁴to meray baap nay mujhay taaleem day kar kaha,

“pooray dil say meray alfaaz apna lay aur har vaqt meray ahkaam par amal kar to too jeeta rahega. ⁵hikmat haasil kar, samajh apna lay! yah cheezen mat bhoolna, meray munh kay alfaaz say door na hona. ⁶hikmat tark na kar to vah tujhay mahfooz rakhegee. us say muhabbat rakh to vah teree dekh-bhaal karegee. ⁷hikmat is say shuroo hotee hai ki too hikmat apna lay. samajh haasil karnay kay liyay baaqee tamaam milkiyat qurbaan karnay kay liyay tayyaar ho. ⁸usay azeez rakh to vah tujhay sarfaraaz karegee, usay galay laga to vah tujhay izzat bakhshegee. ⁹tab vah teray sar ko khoobsoorat siharay say aaraasta karegee aur tujhay shaandaar taaj say navaazegee.”

¹⁰meray betay, meree sun! meree baaten apna lay to teree umr daraaz hogee. ¹¹main tujhay hikmat kee raah par chalnay kee hidaayat deta, tujhay seedhee raahon par phirnay deta hoon. ¹²jab too chalega to teray qadmon ko kisee bhee cheez say roka naheen jaaega, aur daudtay vaqt too thokar naheen khaaega. ¹³tarbiyat ka daaman thaamay rah! usay na chhod balki mahfooz rakh, kyoonki vah teree zindagee hai.

¹⁴bedeenon kee raah par qadam na rakh, shareeron kay raastay par mat ja. ¹⁵us say gurez kar, us par safar na kar balki us say katra kar aagay nikal ja. ¹⁶kyoonki jab tak un say bura kaam sarzad na ho jaaay vah so hee naheen saktay, jab tak unhon nay kisee ko thokar khila kar khaak men mila na diya ho vah neend say maheroom rahetay hain. ¹⁷vah bedeenee kee rotee khaatay aur zulm kee mai peetay hain. ¹⁸lekin raastbaaz kee raah tuloo-ay-subah kee pahelee raushnee kee maanind hai jo din kay urooj tak badhtee rahetee hai. ¹⁹is kay muqaablay men bedeen ka raasta gaheree taareekee kee maanind hai, unhen pata hee naheen chalta ki kis cheez say thokar kha kar gir gaay hain.

²⁰meray betay, meree baaton par dhyaan day, meray alfaaz par kaan dhar. ²¹unhen apnee nazar say ojhal na honay day balki apnay dil men mahfooz rakh. ²²kyoonki jo yah baaten apanaaen vah zindagee aur pooray jism kay liyay shifa paatay hain. ²³tamaam cheezon say pahelay apnay dil kee hifaazat kar, kyoonki yahee zindagee ka sarchashma hai. ²⁴apnay munh say jhoot aur apnay honton say kajgoee door kar. ²⁵dhyaan day ki teree aankhen seedha aagay kee taraf dekhen, ki teree nazar us raastay par lagee rahay jo seedha hai. ²⁶apnay paaon ka raasta chalnay kay qaabil bana day, dhyaan day ki teree raahen mazboot hain. ²⁷na daaeen, na baaeen taraf mud balki apnay paaon ko ghalat qadam uthaanay say baaz rakh.