Zaboor 10
insaaf kay liyay duaa
1ai rabb, too itna door kyoon khada hai? museebat kay vaqt too apnay aap ko posheeda kyoon rakhta hai?
2bedeen takabbur say museebatazadon kay peechhay lag gaay hain, aur ab bechaaray un kay jaalon men ulajhnay lagay hain.
3kyoonki bedeen apnee dilee aarzooon par shekhee maarta hai, aur naajaaiz nafa kamaanay vaala laanat karkay rabb ko haqeer jaanta hai.
4bedeen gharoor say phool kar kaheta hai, “allaah mujh say javaabatalabee naheen karega.” us kay tamaam khayaalaat is baat par mabnee hain ki koee khuda naheen hai.
5jo kuchh bhee karay us men vah kaamyaab hai. teree adaalaten usay bulandiyon men kaheen door lagtee hain jabki vah apnay tamaam mukhaalifon kay khilaaf phunkaarata hai.
6dil men vah sochta hai, “main kabhee naheen dagmagaaoonga, nasal-dar-nasal museebat kay panjon say bacha rahoonga.”
7us ka munh laanton, fareb aur zulm say bhara raheta, us kee zabaan nuqsaan aur aafat pahunchaanay kay liyay tayyaar rahetee hai.
8vah aabaadiyon kay qareeb taak men baith kar chupkay say begunaahon ko maar daalta hai, us kee aankhen badaqismaton kee ghaat men rahetee hain.
9jangal men baithay sherbabar kee tarah taak men rah kar vah museebatzada par hamla karnay ka mauqa dhoondta hai. jab usay pakad lay to usay apnay jaal men ghaseet kar lay jaata hai.
10us kay shikaar paash paash ho kar jhuk jaatay hain, bechaaray us kee zabardast taaqat kee zad men a kar gir jaatay hain.
11tab vah dil men kaheta hai, “allaah bhool gaya hai, us nay apna chihara chhupa liya hai, usay yah kabhee nazar naheen aaega.”
12ai rabb, uth! ai allaah, apna haath utha kar naachaaron kee madad kar aur unhen na bhool.
13bedeen allaah kee tahqeer kyoon karay, vah dil men kyoon kahay, “allaah mujh say javaab talab naheen karega”?
14ai allaah, haqeeqat men too yah sab kuchh dekhta hai. too hamaaree takleef aur pareshaanee par dhyaan day kar munaasib javaab dega. naachaar apna muaamala tujh par chhod deta hai, kyoonki too yateemon ka madadgaar hai.
15shareer aur bedeen aadmee ka baazoo tod day! us say us kee sharaaraton kee javaabatalabee kar taaki us ka poora asar mit jaaay.
16rabb abad tak baadshaah hai. us kay mulk say deegar aqvaam ghaaib ho gaee hain.
17ai rabb, too nay naachaaron kee aarzoo sun lee hai. too un kay dilon ko mazboot karega aur un par dhyaan day kar
18yateemon aur mazloomon ka insaaf karega taaki aainda koee bhee insaan mulk men dahshat na phailaaay.