Zaboor 100

allaah kee sitaaish karo!

¹shukrguzaaree kee qurbaanee kay liyay zaboor.

ai pooree duniya, khushee kay naaray laga kar rabb kee madahsaraaee karo!

²khushee say rabb kee ibaadat karo, jashn manaatay huay us kay huzoor aao!

³jaan lo ki rabb hee khuda hai. usee nay hamen khalaq kiya, aur ham us kay hain, us kee qaum aur us kee charaagaah kee bheden.

⁴shukr kartay huay us kay darvaazon men daakhil ho, sitaaish kartay huay us kee baargaahon men haazir ho. us ka shukr karo, us kay naam kee tamjeed karo!

⁵kyoonki rabb bhala hai. us kee shafqat abdee hai, aur us kee vafaadaaree pusht-dar-pusht qaaim hai.