Zaboor 101
baadshaah kee hukoomat kaisee honee chaahiay?
1daaood ka zaboor.
main shafqat aur insaaf ka geet gaaoonga. ai rabb, main teree madahsaraaee karoonga.
2main badee ehatiyaat say beilzaam raah par chaloonga. lekin too kab meray paas aaega? main khuloosdilee say apnay ghar men zindagee guzaaroonga.
3main sharaarat kee baat apnay saamnay naheen rakhta aur buree harkaton say nafrat karta hoon. aisee cheezen meray saath lipat na jaaen.
4jhoota dil mujh say door rahay. main buraaee ko jaanna hee naheen chaahata.
5jo chupkay say apnay padosee par tuhamat lagaaay usay main khaamosh karaaoonga, jis kee aankhen maghroor aur dil mutakabbir ho usay bardaasht naheen karoonga.
6meree aankhen mulk kay vafaadaaron par lagee rahetee hain taaki vah meray saath rahen. jo beilzaam raah par chalay vahee meree khidmat karay.
7dhokebaaz meray ghar men na thaheray, jhoot bolnay vaala meree maujoodgee men qaaim na rahay.
8har subah ko main mulk kay tamaam bedeenon ko khaamosh karaaoonga taaki tamaam badkaaron ko rabb kay shaher men say mitaaya jaaay.