Zaboor 102
siyyoon kee bahaalee kay liyay dua (tauba ka paanchvaan zaboor)
1museebatzada kee dua, us vaqt jab vah nidhaal ho kar rabb kay saamnay apnee aah-o-zaaree undel deta hai.
ai rabb, meree dua sun! madad kay liyay meree aahen teray huzoor pahunchen.
2jab main museebat men hoon to apna chihara mujh say chhupaaay na rakh balki apna kaan meree taraf jhuka. jab main pukaaroon to jald hee meree sun.
3kyoonki meray din dhuen kee tarah ghaaib ho rahay hain, meree haddiyaan koilon kee tarah dahek rahee hain.
4mera dil ghaas kee tarah jhulas kar sookh gaya hai, aur main rotee khaana bhee bhool gaya hoon.
5aah-o-zaaree kartay kartay mera jism sukad gaya hai, jild aur haddiyaan hee rah gaee hain.
6main registaan men dashtee ulloo aur khandaraat men chhotay ulloo kee maanind hoon.
7main bistar par jaagta raheta hoon, chhat par tanha parinday kee maanind hoon.
8din bhar meray dushman mujhay laan-taan kartay hain. jo mera mazaaq udaatay hain vah mera naam lay kar laanat kartay hain.
9raakh meree rotee hai, aur jo kuchh peeta hoon us men meray aansoo milay hotay hain.
10kyoonki mujh par teree laanat aur tera ghazab naazil hua hai. too nay mujhay utha kar zameen par patakh diya hai.
11meray din shaam kay dhalnay vaalay saay kee maanind hain. main ghaas kee tarah sookh raha hoon.
12lekin too ai rabb abad tak takhtnasheen hai, tera naam pusht-dar-pusht qaaim raheta hai.
13ab a, koh-ay-siyyoon par rahem kar. kyoonki us par meharbaanee karnay ka vaqt a gaya hai, muqarrara vaqt a gaya hai.
14kyoonki teray khaadimon ko us ka ek ek patthar piyaara hai, aur vah us kay malbay par taras khaatay hain.
15tab hee qaumen rabb kay naam say darengee, aur duniya kay tamaam baadshaah teray jalaal ka khauf khaaengay.
16kyoonki rabb siyyoon ko az sar-ay-nau taameer karega, vah apnay pooray jalaal kay saath zaahir ho jaaega.
17muflison kee dua par vah dhyaan dega aur un kee faryaadon ko haqeer naheen jaanega.
18aanay vaalee nasal kay liyay yah qalamband ho jaaay taaki jo qaum abhee paida naheen huee vah rabb kee sitaaish karay.
19kyoonki rabb nay apnay maqdis kee bulandiyon say jhaanka hai, us nay aasmaan say zameen par nazar daalee hai
20taaki qaidiyon kee aah-o-zaaree sunay aur marnay vaalon kee zanjeeren kholay.
21kyoonki us kee marzee hai ki vah koh-ay-siyyoon par rabb kay naam ka elaan karen aur yarooshalam men us kee sitaaish karen,
22ki qaumen aur saltanaten mil kar jama ho jaaen aur rabb kee ibaadat karen.
23raastay men hee allaah nay meree taaqat tod kar meray din mukhtasar kar diay hain.
24main bola, “ai meray khuda, mujhay zindon kay mulk say door na kar, meree zindagee to adhooree rah gaee hai. lekin teray saal pusht-dar-pusht qaaim rahetay hain.
25too nay qadeem zamaanay men zameen kee bunyaad rakhee, aur teray hee haathon nay aasmaanon ko banaaya.
26yah to tabaah ho jaaengay, lekin too qaaim rahega. yah sab kapday kee tarah ghis phat jaaengay. too unhen puraanay libaas kee tarah badal dega, aur vah jaatay rahengay.
27lekin too vahee ka vahee raheta hai, aur teree zindagee kabhee khatm naheen hotee.
28teray khaadimon kay farzand teray huzoor bastay rahengay, aur un kee aulaad teray saamnay qaaim rahegee.”