Zaboor 103
rabb kee shafqat kee sitaaish
1daaood ka zaboor.
ai meree jaan, rabb kee sitaaish kar! mera rag-o-resha us kay quddoos naam kee hamd karay!
2ai meree jaan, rabb kee sitaaish kar aur jo kuchh us nay teray liyay kiya hai usay bhool na ja.
3kyoonki vah teray tamaam gunaahon ko muaaf karta, tujhay tamaam beemaariyon say shifa deta hai.
4vah ivzaana day kar teree jaan ko maut kay gadhay say chhuda leta, teray sar ko apnee shafqat aur rahemat kay taaj say aaraasta karta hai.
5vah teree zindagee ko achchhee cheezon say ser karta hai, aur too dubaara javaan ho kar uqaab kee see taqviyat paata hai.
6rabb tamaam mazloomon kay liyay raastee aur insaaf qaaim karta hai.
7us nay apnee raahen moosa par aur apnay azeem kaam israaeeliyon par zaahir kiay.
8rabb raheem aur meharbaan hai, vah tahemmul aur shafqat say bharpoor hai.
9na vah hamesha daantta rahega, na abad tak naaraaz rahega.
10na vah hamaaree khataaon kay mutaabiq saza deta, na hamaaray gunaahon ka munaasib ajr deta hai.
11kyoonki jitna buland aasmaan hai, utnee hee azeem us kee shafqat un par hai jo us ka khauf maantay hain.
12jitnee door mashriq maghrib say hai utna hee us nay hamaaray qusoor ham say door kar diay hain.
13jis tarah baap apnay bachchon par taras khaata hai usee tarah rabb un par taras khaata hai jo us ka khauf maantay hain.
14kyoonki vah hamaaree saakht jaanta hai, usay yaad hai ki ham khaak hee hain.
15insaan kay din ghaas kee maanind hain, aur vah janglee phool kee tarah hee phalta phoolta hai.
16jab us par say hava guzray to vah naheen raheta, aur us kay naam-o-nishaan ka bhee pata naheen chalta.
17lekin jo rabb ka khauf maanen un par vah hamesha tak meharbaanee karega, vah apnee raastee un kay poton aur navaason par bhee zaahir karega.
18shart yah hai ki vah us kay ahd kay mutaabiq zindagee guzaaren aur dhyaan say us kay ahkaam par amal karen.
19rabb nay aasmaan par apna takht qaaim kiya hai, aur us kee baadshaahee sab par hukoomat kartee hai.
20ai rabb kay farishto, us kay taaqatvar soormaao, jo us kay farmaan pooray kartay ho taaki us ka kalaam maana jaaay, rabb kee sitaaish karo!
21ai tamaam lashkro, tum sab jo us kay khaadim ho aur us kee marzee pooree kartay ho, rabb kee sitaaish karo!
22tum sab jinhen us nay banaaya, rabb kee sitaaish karo! us kee saltanat kee har jagah par us kee tamjeed karo. ai meree jaan, rabb kee sitaaish kar