Zaboor 105
maazee men rabb kee najaat kee hamd
1rabb ka shukr karo aur us ka naam pukaaro! aqvaam men us kay kaamon ka elaan karo.
2saaz baja kar us kee madahsaraaee karo. us kay tamaam ajaaib kay baaray men logon ko bataao.
3us kay muqaddas naam par fakhar karo. rabb kay taalib dil say khush hon.
4rabb aur us kee qudrat kee darayaaft karo, har vaqt us kay chiharay kay taalib raho.
5jo mojizay us nay kiay unhen yaad karo. us kay ilaahee nishaan aur us kay munh kay faislay duharaatay raho.
6tum jo us kay khaadim ibraaheem kee aulaad aur yaaqoob kay farzand ho, jo us kay barguzeeda log ho, tumhen sab kuchh yaad rahay!
7vahee rabb hamaara khuda hai, vahee pooree duniya kee adaalat karta hai.
8vah hamesha apnay ahd ka khayaal rakhta hai, us kalaam ka jo us nay hazaar pushton kay liyay farmaaya tha.
9yah vah ahd hai jo us nay ibraaheem say baandha, vah vaada jo us nay qasam kha kar ishaaq say kiya tha.
10us nay usay yaaqoob kay liyay qaaim kiya taaki vah us kay mutaabiq zindagee guzaaray, us nay tasdeeq kee ki yah mera israaeel say abdee ahd hai.
11saath saath us nay farmaaya, “main tujhay mulk-ay-kan’aan doonga. yah teree meeraas ka hissa hoga.”
12us vaqt vah taadaad men kam aur thoday hee thay balki mulk men ajnabee hee thay.
13ab tak vah mukhtalif qaumon aur saltanaton men ghoomtay phirtay thay.
14lekin allaah nay un par kisee ko zulm karnay na diya, aur un kee khaatir us nay baadshaahon ko daanta,
15“meray masah kiay huay khaadimon ko mat chhedna, meray nabiyon ko nuqsaan mat pahunchaana.”
16phir allaah nay mulk-ay-kan’aan men kaal padnay diya aur khuraak ka har zakheera khatm kiya.
17lekin us nay un kay aagay aagay ek aadmee ko misr bheja yaanee yoosuf ko jo ghulaam ban kar farokht hua.
18us kay paaon aur gardan zanjeeron men jakday rahe
19jab tak vah kuchh poora na hua jis kee peshgoee yoosuf nay kee thee, jab tak rabb kay farmaan nay us kee tasdeeq na kee.
20tab misree baadshaah nay apnay bandon ko bhej kar usay rihaaee dee, qaumon kay hukmaraan nay usay aazaad kiya.
21us nay usay apnay gharaanay par nigraan aur apnee tamaam milkiyat par hukmaraan muqarrar kiya.
22yoosuf ko firaaun kay raeeson ko apnee marzee kay mutaabiq chalaanay aur misree buzurgon ko hikmat kee taaleem denay kee zimmaadaaree bhee dee gaee.
23phir yaaqoob ka khaandaan misr aaya, aur israaeel haam kay mulk men ajnabee kee haisiyat say basnay laga.
24vahaan allaah nay apnee qaum ko bahut phalnay phoolnay diya, us nay usay us kay dushmanon say ziyaada taaqatvar bana diya.
25saath saath us nay misriyon ka ravayya badal diya, to vah us kee qaum israaeel say nafrat karkay rabb kay khaadimon say chaalaakiyaan karnay lagay.
26tab allaah nay apnay khaadim moosa aur apnay chunay huay banday haaroon ko misr men bheja.
27mulk-ay-haam men a kar unhon nay un kay darmiyaan allaah kay ilaahee nishaan aur mojizay dikhaaay.
28allaah kay hukm par misr par taareekee chha gaee, mulk men andhera ho gaya. lekin unhon nay us kay farmaan na maanay.
29us nay un ka paanee khoon men badal kar un kee machhliyon ko marva diya.
30misr kay mulk par mendhkon kay ghol chha gaay jo un kay hukmaraanon kay androonee kamron tak pahunch gaay.
31allaah kay hukm par misr kay pooray ilaaqay men makkhiyon aur jooon kay ghol phail gaay.
32baarish kee bajaay us nay un kay mulk par olay aur dahektay sholay barsaaay.
33us nay un kee angoor kee belen aur anjeer kay darakht tabaah kar diay, un kay ilaaqay kay darakht tod daalay.
34us kay hukm par anaginat tiddiyaan apnay bachchon samet mulk par hamlaaaavar hueen.
35vah un kay mulk kee tamaam hariyaalee aur un kay kheton kee tamaam paidaavaar chat kar gaeen.
36phir allaah nay misr men tamaam pahelauthon ko maar daala, un kee mardaangee ka pahela phal tamaam hua.
37is kay baad vah israaeel ko chaandee aur sonay say navaaz kar misr say nikaal laaya. us vaqt us kay qabeelon men thokar khaanay vaala ek bhee naheen tha.
38misr khush tha jab vah ravaana huay, kyoonki un par israaeel kee dahshat chha gaee thee.
39din ko allaah nay un kay oopar baadal kambal kee tarah bichha diya, raat ko aag muhayya kee taaki raushnee ho.
40jab unhon nay khuraak maangee to us nay unhen bater pahuncha kar aasmaanee rotee say ser kiya.
41us nay chataan ko chaak kiya to paanee phoot nikla, aur registaan men paanee kee nadiyaan bahenay lageen.
42kyoonki us nay us muqaddas vaaday ka khayaal rakha jo us nay apnay khaadim ibraaheem say kiya tha.
43chunaanchay vah apnee chunee huee qaum ko misr say nikaal laaya, aur vah khushee aur shaadmaanee kay naaray laga kar nikal aaay.
44us nay unhen deegar aqvaam kay mamaalik diay, aur unhon nay deegar ummaton kee mehanat kay phal par qabza kiya.
45kyoonki vah chaahata tha ki vah us kay ahkaam aur hidaayaat kay mutaabiq zindagee guzaaren. rabb kee hamd ho.