paanchveen kitaab 107-150

najaatayaafta kee shukrguzaaree

¹rabb ka shukr karo, kyoonki vah bhala hai, aur us kee shafqat abdee hai.

²rabb kay najaatayaafta jin ko us nay ivzaana day kar dushman kay qabzay say chhudaaya hai sab yah kahen.

³us nay unhen mashriq say maghrib tak aur shimaal say junoob tak deegar mamaalik say ikattha kiya hai.

⁴baaz registaan men saheeh raasta bhool kar veeraan raastay par maaray maaray phiray, aur kaheen bhee aabaadee na milee.

⁵bhook aur piyaas kay maaray un kee jaan nidhaal ho gaee.

⁶tab unhon nay apnee museebat men rabb ko pukaara, aur us nay unhen un kee tamaam pareshaaniyon say chhutkaara diya.

⁷us nay unhen saheeh raah par la kar aisee aabaadee tak pahunchaaya jahaan rah saktay thay.

⁸vah rabb ka shukr karen ki us nay apnee shafqat aur apnay mojizay insaan par zaahir kiay hain.

⁹kyoonki vah piyaasee jaan ko aasooda karta aur bhookee jaan ko kasrat kee achchhee cheezon say ser karta hai.

¹⁰doosray zanjeeron aur museebat men jakday huay andheray aur gaheree taareekee men bastay thay,

¹¹kyoonki vah allaah kay farmaanon say sarkash huay thay, unhon nay allaah t’aala ka faisla haqeer jaana tha.

¹²is liyay allaah nay un kay dil ko takleef men mubtala karkay past kar diya. jab vah thokar kha kar gir gaay aur madad karnay vaala koee na raha thaa

¹³to unhon nay apnee museebat men rabb ko pukaara, aur us nay unhen un kee tamaam pareshaaniyon say chhutkaara diya.

¹⁴vah unhen andheray aur gaheree taareekee say nikaal laaya aur un kee zanjeeren tod daaleen.

¹⁵vah rabb ka shukr karen ki us nay apnee shafqat aur apnay mojizay insaan par zaahir kiay hain.

¹⁶kyoonki us nay peetal kay darvaazay tod daalay, lohay kay kunday tukday tukday kar diay hain.

¹⁷kuchh log ahemaq thay, vah apnay sarkash chaal-chalan aur gunaahon kay baais pareshaaniyon men mubtala huay.

¹⁸unhen har khuraak say ghin aanay lagee, aur vah maut kay darvaazon kay qareeb pahunchay.

¹⁹tab unhon nay apnee museebat men rabb ko pukaara, aur us nay unhen un kee tamaam pareshaaniyon say chhutkaara diya.

²⁰us nay apna kalaam bhej kar unhen shifa dee aur unhen maut kay gadhay say bachaaya.

²¹vah rabb ka shukr karen ki us nay apnee shafqat aur mojizay insaan par zaahir kiay hain.

²²vah shukrguzaaree kee qurbaaniyaan pesh karen aur khushee kay naaray laga kar us kay kaamon ka charcha karen.

²³baaz baheree jahaaz men baith gaay aur tijaarat kay silsilay men samundar par safar kartay kartay doordaraaz ilaaqon tak pahunchay.

²⁴unhon nay rabb kay azeem kaam aur samundar kee gaheraaiyon men us kay mojizay dekhay hain.

²⁵kyoonki rabb nay hukm diya to aandhee chalee jo samundar kee maujen bulandiyon par laaee.

²⁶vah aasmaan tak chadheen aur gaheraaiyon tak utreen. pareshaanee kay baais mallaahon kee himmat javaab day gaee.

²⁷vah sharaab men dhut aadmee kee tarah ladkhadaatay aur dagmagaatay rahay. un kee tamaam hikmat naakaam saabit huee.

²⁸tab unhon nay apnee museebat men rabb ko pukaara, aur us nay unhen tamaam pareshaaniyon say chhutkaara diya.

²⁹us nay samundar ko thama diya aur khaamoshee phail gaee, laheren saakit ho gaeen.

³⁰musaafir pursukoon haalaat dekh kar khush huay, aur allaah nay unhen manzil-ay-maqsood tak pahunchaaya.

³¹vah rabb ka shukr karen ki us nay apnee shafqat aur apnay mojizay insaan par zaahir kiay hain.

³²vah qaum kee jamaaat men us kee taazeem karen, buzurgon kee majlis men us kee hamd karen.

³³kaee jagahon par vah daryaaon ko registaan men aur chashmon ko piyaasee zameen men badal deta hai.

³⁴baashindon kee buraaee dekh kar vah zarkhez zameen ko kallar kay biyaabaan men badal deta hai.

³⁵doosree jagahon par vah registaan ko jheel men aur piyaasee zameen ko chashmon men badal deta hai.

³⁶vahaan vah bhookon ko basa deta hai taaki aabaadiyaan qaaim karen.

³⁷tab vah khet aur angoor kay baagh lagaatay hain jo khoob phal laatay hain.

³⁸allaah unhen barkat deta hai to un kee taadaad bahut badh jaatee hai. vah un kay revdon ko bhee kam honay naheen deta.

³⁹jab kabhee un kee taadaad kam ho jaatee aur vah museebat aur dukh kay bojh talay khaak men dab jaatay hain

⁴⁰to vah shurfa par apnee hiqaarat undel deta aur unhen registaan men bhaga kar saheeh raastay say door phirnay deta hai.

⁴¹lekin muhtaaj ko vah museebat kee daldal say nikaal kar sarfaraaz karta aur us kay khaandaanon ko bhed-bakriyon kee tarah badha deta hai.

⁴²seedhee raah par chalnay vaalay yah dekh kar khush hongay, lekin beinsaaf ka munh band kiya jaaega.

⁴³kaun daanishmand hai? vah is par dhyaan day, vah rabb kee meharbaaniyon par ghaur karay.