Zaboor 108
jang men rabb par ummeed
1daaood ka zaboor. geet.
ai allaah, mera dil mazboot hai. main saaz baja kar teree madahsaraaee karoonga. ai meree jaan, jaag uth!
2ai sitaar aur sarod, jaag utho! main tuloo-ay-subah ko jagaaoonga.
3ai rabb, main qaumon men teree sitaaish, ummaton men teree madahsaraaee karoonga.
4kyoonki teree shafqat aasmaan say kaheen buland hai, teree vafaadaaree baadlon tak pahunchtee hai.
5ai allaah, aasmaan par sarfaraaz ho! tera jalaal pooree duniya par chha jaaay.
6apnay dahenay haath say madad karkay meree sun taaki jo tujhay piyaaray hain najaat paaen.
7allaah nay apnay maqdis men farmaaya hai, “main fatah manaatay huay sikam ko taqseem karoonga aur vaadee-ay-sukkaat ko naap kar baant doonga.
8jiliaad mera hai aur manassee mera hai. ifraaeem mera khod aur yahoodaah mera shaahee asa hai.
9moaab mera ghusal ka bartan hai, aur adom par main apna joota phaink doonga. main filistee mulk par zordaar naaray lagaaoonga!”
10kaun mujhay qil’aaband shaher men laaega? kaun meree raahanumaaee karkay mujhay adom tak pahunchaaega?
11ai allaah, too hee yah kar sakta hai, go too nay hamen radd kiya hai. ai allaah, too hamaaree faujon ka saath naheen deta jab vah ladnay kay liyay nikaltee hain.
12museebat men hamen sahaara day, kyoonki is vaqt insaanee madad bekaar hai.
13allaah kay saath ham zabardast kaam karengay, kyoonki vahee hamaaray dushmanon ko kuchal dega.