Zaboor 109

berahem mukhaalif kay saamnay allaah say duaa

¹daaood ka zaboor. mooseeqee kay raahanuma kay liyay.

ai allaah meray fakhar, khaamosh na rah!

²kyoonki unhon nay apna bedeen aur farebdih munh meray khilaaf khol kar jhootee zabaan say meray saath baat kee hai.

³vah mujhay nafrat kay alfaaz say gher kar bilaavajah mujh say laday hain.

⁴meree muhabbat kay javaab men vah mujh par apnee dushmanee ka izhaar kartay hain. lekin dua hee mera sahaara hai.

⁵meree nekee kay ivz vah mujhay nuqsaan pahunchaatay aur meray piyaar kay badlay mujh say nafrat kartay hain.

⁶ai allaah, kisee bedeen ko muqarrar kar jo meray dushman kay khilaaf gavaahee day, koee mukhaalif us kay dahenay haath khada ho jaaay jo us par ilzaam lagaaay.

⁷muqaddmay men usay mujrim thaheraaya jaaay. us kee duaaen bhee us kay gunaahon men shumaar kee jaaen.

⁸us kee zindagee mukhtasar ho, koee aur us kee zimmaadaaree uthaaay.

⁹us kee aulaad yateem aur us kee beevee beva ban jaaay.

¹⁰us kay bachchay aavaara phiren aur bheek maangnay par majboor ho jaaen. unhen un kay tabaahashuda gharon say nikal kar idhar udhar rotee dhoondnee paday.

¹¹jis say us nay qarza liya tha vah us kay tamaam maal par qabza karay, aur ajnabee us kee mehanat ka phal loot len.

¹²koee na ho jo us par meharbaanee karay ya us kay yateemon par rahem karay.

¹³us kee aulaad ko mitaaya jaaay, aglee pusht men un ka naam-o-nishaan tak na rahay.

¹⁴rabb us kay baapdaada kee naainsaafee ka lihaaz karay, aur vah us kee maan kee khata bhee darguzar na karay.

¹⁵un ka bura kirdaar rabb kay saamnay rahay, aur vah un kee yaad roo-ay-zameen par say mita daalay.

¹⁶kyoonki us ko kabhee meharbaanee karnay ka khayaal na aaya balki vah museebatzada, muhtaaj aur shikastaadil ka taaqqub karta raha taaki usay maar daalay.

¹⁷usay laanat karnay ka shauq tha, chunaanchay laanat usee par aaay! usay barkat dena pasand naheen tha, chunaanchay barkat us say door rahay.

¹⁸us nay laanat chaadar kee tarah odh lee, chunaanchay laanat paanee kee tarah us kay jism men aur tel kee tarah us kee haddiyon men siraayat kar jaaay.

¹⁹vah kapday kee tarah us say liptee rahay, patkay kee tarah hamesha us say kamarbasta rahay.

²⁰rabb meray mukhaalifon ko aur unhen jo meray khilaaf buree baaten kartay hain yahee saza day.

²¹lekin too ai rabb qaadir-ay-mutlaq, apnay naam kee khaatir meray saath meharbaanee ka sulook kar. mujhay bacha, kyoonki teree hee shafqat tasalleebakhsh hai.

²²kyoonki main museebatzada aur zarooratmand hoon. mera dil meray andar majrooh hai.

²³shaam kay dhaltay saay kee tarah main khatm honay vaala hoon. mujhay tiddee kee tarah jhaad kar door kar diya gaya hai.

²⁴roza rakhtay rakhtay meray ghutnay dagmagaanay lagay aur mera jism sookh gaya hai.

²⁵main apnay dushmanon kay liyay mazaaq ka nishaana ban gaya hoon. mujhay dekh kar vah sar hila kar “tauba tauba” kahetay hain.

²⁶ai rabb meray khuda, meree madad kar! apnee shafqat ka izhaar karkay mujhay chhuda!

²⁷unhen pata chalay ki yah teray haath say pesh aaya hai, ki too rabb hee nay yah sab kuchh kiya hai.

²⁸jab vah laanat karen to mujhay barkat day! jab vah meray khilaaf uthen to bakhsh day ki sharminda ho jaaen jabki tera khaadim khush ho.

²⁹meray mukhaalif rusvaaee say mulabbas ho jaaen, unhen sharmindagee kee chaadar odhnee paday.

³⁰main zor say rabb kee sitaaish karoonga, bahuton kay darmiyaan us kee hamd karoonga.

³¹kyoonki vah muhtaaj kay dahenay haath khada raheta hai taaki usay un say bachaaay jo usay mujrim thaheraatay hain.