Zaboor 11

rabb par bharosaa

¹daaood ka zaboor. mooseeqee kay raahanuma kay liyay.

main nay rabb men panaah lee hai. to phir tum kis tarah mujh say kahetay ho, “chal, parinday kee tarah phadaphda kar pahaadon men bhaag ja”?

²kyoonki dekho, bedeen kamaan taan kar teer ko taant par laga chukay hain. ab vah andheray men baith kar is intizaar men hain ki dil say seedhee raah par chalnay vaalon par chalaaen.

³raastbaaz kya karay? unhon nay to bunyaad ko hee tabaah kar diya hai.

⁴lekin rabb apnee muqaddas sukoonatgaah men hai, rabb ka takht aasmaan par hai. vahaan say vah dekhta hai, vahaan say us kee aankhen aadmazaadon ko parakhtee hain.

⁵rabb raastbaaz ko parakhta to hai, lekin bedeen aur zaalim say nafrat hee karta hai.

⁶bedeenon par vah jaltay huay koilay aur sholaazan gandhak barsa dega. jhulasnay vaalee aandhee un ka hissa hogee.

⁷kyoonki rabb raast hai, aur usay insaaf piyaara hai. sirf seedhee raah par chalnay vaalay us ka chihara dekhengay.