Zaboor 111

allaah kay fazl kee tamjeed

¹rabb kee hamd ho! main pooray dil say diyaanatdaaron kee majlis aur jamaaat men rabb ka shukr karoonga.

²rabb kay kaam azeem hain. jo un say lutf’andoz hotay hain vah un ka khoob mutaal’a kartay hain.

³us ka kaam shaandaar aur jalaalee hai, us kee raastee abad tak qaaim rahetee hai.

⁴vah apnay mojizay yaad karaata hai. rabb meharbaan aur raheem hai.

⁵jo us ka khauf maantay hain unhen us nay khuraak muhayya kee hai. vah hamesha tak apnay ahd ka khayaal rakhega.

⁶us nay apnee qaum ko apnay zabardast kaamon ka elaan karkay kaha, “main tumhen ghairqaumon kee meeraas ata karoonga.”

⁷jo bhee kaam us kay haath karen vah sachchay aur raast hain. us kay tamaam ahkaam qaabil-ay-etimaad hain.

⁸vah azal say abad tak qaaim hain, aur un par sachchaaee aur diyaanatdaaree say amal karna hai.

⁹us nay apnee qaum ka fidya bhej kar usay chhudaaya hai. us nay farmaaya, “mera qaum kay saath ahd abad tak qaaim rahay.” us ka naam quddoos aur purjalaal hai.

¹⁰hikmat is say shuroo hotee hai ki ham rabb ka khauf maanen. jo bhee us kay ahkaam par amal karay usay achchhee samajh haasil hogee. us kee hamd hamesha tak qaaim rahegee.