Zaboor 112
allaah kay khauf kee taareef
1rabb kee hamd ho! mubaarak hai vah jo allaah ka khauf maanta aur us kay ahkaam say bahut lutf’andoz hota hai.
2us kay farzand mulk men taaqatvar hongay, aur diyaanatdaar kee nasal ko barkat milegee.
3daulat aur khushhaalee us kay ghar men rahegee, aur us kee raastbaazee abad tak qaaim rahegee.
4andheray men chaltay vaqt diyaanatdaaron par raushnee chamaktee hai. vah raastbaaz, meharbaan aur raheem hai.
5meharbaanee karna aur qarz dena baabarkat hai. jo apnay muaamlon ko insaaf say hal karay vah achchha karega,
6kyoonki vah abad tak naheen dagmagaaega. raastbaaz hamesha hee yaad rahega.
7vah buree khabar milnay say naheen darta. us ka dil mazboot hai, aur vah rabb par bharosa rakhta hai.
8us ka dil mustahkam hai. vah sahema hua naheen raheta, kyoonki vah jaanta hai ki ek din main apnay dushmanon kee shikast dekh kar khush hoonga.
9vah fayyaazee say zarooratmandon men khairaat bikher deta hai. us kee raastbaazee hamesha qaaim rahegee, aur usay izzat kay saath sarfaraaz kiya jaaega.
10bedeen yah dekh kar naaraaz ho jaaega, vah daant pees pees kar nest ho jaaega. jo kuchh bedeen chaahatay hain vah jaata rahega.