Zaboor 114

misr men allaah kay mojizaat

¹jab israaeel misr say ravaana hua aur yaaqoob ka gharaana ajnabee zabaan bolnay vaalee qaum say nikal aayaa

²to yahoodaah allaah ka maqdis ban gaya aur israaeel us kee baadshaahee.

³yah dekh kar samundar bhaag gaya aur darya-ay-yardan peechhay hat gaya.

⁴pahaad mendhon kee tarah koodnay aur pahaadiyaan javaan bhed-bakriyon kee tarah phaandnay lageen.

⁵ai samundar, kya hua ki too bhaag gaya hai? ai yardan, kya hua ki too peechhay hat gaya hai?

⁶ai pahaado, kya hua ki tum mendhon kee tarah koodnay lagay ho? ai pahaadiyo, kya hua ki tum javaan bhed-bakriyon kee tarah phaandnay lagee ho?

⁷ai zameen, rabb kay huzoor, yaaqoob kay khuda kay huzoor laraz uth,

⁸us kay saamnay tharathra jis nay chataan ko johad men aur sakht patthar ko chashmay men badal diya.