Zaboor 115
allaah hee kee hamd ho
1ai rabb, hamaaree hee izzat kee khaatir kaam na kar balki is liyay ki teray naam ko jalaal milay, is liyay ki too meharbaan aur vafaadaar khuda hai.
2deegar aqvaam kyoon kahen, “un ka khuda kahaan hai?”
3hamaara khuda to aasmaan par hai, aur jo jee chaahay karta hai.
4un kay but sonay-chaandee kay hain, insaan kay haath nay unhen banaaya hai.
5un kay munh hain lekin vah bol naheen saktay. un kee aankhen hain lekin vah dekh naheen saktay.
6un kay kaan hain lekin vah sun naheen saktay, un kee naak hai lekin vah soongh naheen saktay.
7un kay haath hain, lekin vah chhoo naheen saktay. un kay paaon hain, lekin vah chal naheen saktay. un kay galay say aavaaz naheen nikaltee.
8jo but banaatay hain vah un kee maanind ho jaaen, jo un par bharosa rakhtay hain vah un jaisay behiss-o-harkat ho jaaen.
9ai israaeel, rabb par bharosa rakh! vahee tera sahaara aur teree dhaal hai.
10ai haaroon kay gharaanay, rabb par bharosa rakh! vahee tera sahaara aur teree dhaal hai.
11ai rabb ka khauf maannay vaalo, rabb par bharosa rakho! vahee tumhaara sahaara aur tumhaaree dhaal hai.
12rabb nay hamaara khayaal kiya hai, aur vah hamen barkat dega. vah israaeel kay gharaanay ko barkat dega, vah haaroon kay gharaanay ko barkat dega.
13vah rabb ka khauf maannay vaalon ko barkat dega, khwaah chhotay hon ya baday.
14rabb tumhaaree taadaad men izaafa karay, tumhaaree bhee aur tumhaaree aulaad kee bhee.
15rabb jo aasmaan-o-zameen ka khaaliq hai tumhen barkat say maalaamaal karay.
16aasmaan to rabb ka hai, lekin zameen ko us nay aadmazaadon ko bakhsh diya hai.
17ai rabb, murday teree sitaaish naheen kartay, khaamoshee kay mulk men utarnay vaalon men say koee bhee teree tamjeed naheen karta.
18lekin ham rabb kee sitaaish ab say abad tak karengay. rabb kee hamd ho