Zaboor 116
maut say najaat par shukrguzaaree
1main rabb say muhabbat rakhta hoon, kyoonki us nay meree aavaaz aur meree iltija sunee hai.
2us nay apna kaan meree taraf jhukaaya hai, is liyay main umr bhar usay pukaaroonga.
3maut nay mujhay apnee zanjeeron men jakad liya, aur paataal kee pareshaaniyaan mujh par ghaalib aaeen. main museebat aur dukh men phans gaya.
4tab main nay rabb ka naam pukaara, “ai rabb, meharbaanee karkay mujhay bacha!”
5rabb meharbaan aur raast hai, hamaara khuda raheem hai.
6rabb saada logon kee hifaazat karta hai. jab main pastahaal tha to us nay mujhay bachaaya.
7ai meree jaan, apnee aaraamgaah kay paas vaapas a, kyoonki rabb nay teray saath bhalaaee kee hai.
8kyoonki ai rabb, too nay meree jaan ko maut say, meree aankhon ko aansoo bahaanay say aur meray paaon ko phisalnay say bachaaya hai.
9ab main zindon kee zameen men rah kar rabb kay huzoor chaloonga.
10main eemaan laaya aur is liyay bola, “main shadeed museebat men phans gaya hoon.”
11main sakht ghabra gaya aur bola, “tamaam insaan daroghgo hain.”
12jo bhalaaiyaan rabb nay meray saath kee hain un sab kay ivz main kya doon?
13main najaat ka piyaala utha kar rabb ka naam pukaaroonga.
14main rabb kay huzoor us kee saaree qaum kay saamnay hee apnee mannaten pooree karoonga.
15rabb kee nigaah men us kay eemaandaaron kee maut giraanqdar hai.
16ai rabb, yaqeenan main tera khaadim, haan tera khaadim aur teree khaadima ka beta hoon. too nay meree zanjeeron ko tod daala hai.
17main tujhay shukrguzaaree kee qurbaanee pesh karkay tera naam pukaaroonga.
18main rabb kay huzoor us kee saaree qaum kay saamnay hee apnee mannaten pooree karoonga.
19main rabb kay ghar kee baargaahon men, ai yarooshalam teray beech men hee unhen poora karoonga. rabb kee hamd ho.