Zaboor 118
allaah kee madad par shukrguzaaree
1rabb ka shukr karo, kyoonki vah bhala hai, aur us kee shafqat abdee hai.
2israaeel kahay, “us kee shafqat abdee hai.”
3haaroon ka gharaana kahay, “us kee shafqat abdee hai.”
4rabb ka khauf maannay vaalay kahen, “us kee shafqat abdee hai.”
5museebat men main nay rabb ko pukaara to rabb nay meree sun kar meray paaon ko khulay maidaan men qaaim kar diya hai.
6rabb meray haq men hai, is liyay main naheen daroonga. insaan mera kya bigaad sakta hai?
7rabb meray haq men hai aur mera sahaara hai, is liyay main un kee shikast dekh kar khush hoonga jo mujh say nafrat kartay hain.
8rabb men panaah lena insaan par etimaad karnay say kaheen behatar hai.
9rabb men panaah lena shurfa par etimaad karnay say kaheen behatar hai.
10tamaam aqvaam nay mujhay gher liya, lekin main nay allaah ka naam lay kar unhen bhaga diya.
11unhon nay mujhay gher liya, haan chaaron taraf say gher liya, lekin main nay allaah ka naam lay kar unhen bhaga diya.
12vah shahed kee makkhiyon kee tarah chaaron taraf say mujh par hamlaaaavar huay, lekin kaantedaar jhaadiyon kee aag kee tarah jald hee bujh gaay. main nay rabb ka naam lay kar unhen bhaga diya.
13dushman nay mujhay dhakka day kar giraanay kee koshish kee, lekin rabb nay meree madad kee.
14rabb meree quvvat aur mera geet hai, vah meree najaat ban gaya hai.
15khushee aur fatah kay naaray raastbaazon kay khaimon men goonjtay hain, “rabb ka dahena haath zabardast kaam karta hai!
16rabb ka dahena haath sarfaraaz karta hai, rabb ka dahena haath zabardast kaam karta hai!”
17main naheen maroonga balki zinda rah kar rabb kay kaam bayaan karoonga.
18go rabb nay meree sakht taadeeb kee hai, us nay mujhay maut kay havaalay naheen kiya.
19raastee kay darvaazay meray liyay khol do taaki main un men daakhil ho kar rabb ka shukr karoon.
20yah rabb ka darvaaza hai, isee men raastbaaz daakhil hotay hain.
21main tera shukr karta hoon, kyoonki too nay meree sun kar mujhay bachaaya hai.
22jis patthar ko makaan banaanay vaalon nay radd kiya vah konay ka bunyaadee patthar ban gaya.
23yah rabb nay kiya aur dekhnay men kitna hairat’angez hai.
24isee din rabb nay apnee qudrat dikhaaee hai. aao, ham shaadiyaana baja kar us kee khushee manaaen.
25ai rabb, meharbaanee karkay hamen bacha! ai rabb, meharbaanee karkay kaamyaabee ata farma!
26mubaarak hai vah jo rabb kay naam say aata hai. rabb kee sukoonatgaah say ham tumhen barkat detay hain.
27rabb hee khuda hai, aur us nay hamen raushnee bakhshee hai. aao, eed kee qurbaanee rassiyon say qurbaangaah kay seengon kay saath baandho.
28too mera khuda hai, aur main tera shukr karta hoon. ai meray khuda, main teree taazeem karta hoon.
29rabb kee sitaaish karo, kyoonki vah bhala hai aur us kee shafqat abdee hai.