Zaboor 119
allaah kay kalaam kee shaan
1
1mubaarak hain vah jin ka chaal-chalan beilzaam hai, jo rabb kee shareeat kay mutaabiq zindagee guzaartay hain.
2mubaarak hain vah jo us kay ahkaam par amal kartay aur pooray dil say us kay taalib rahetay hain,
3jo badee naheen kartay balki us kee raahon par chaltay hain.
4too nay hamen apnay ahkaam diay hain, aur too chaahata hai ki ham har lihaaz say un kay taabay rahen.
5kaash meree raahen itnee pukhta hon ki main saabitqadmee say teray ahkaam par amal karoon!
6tab main sharminda naheen hoonga, kyoonki meree aankhen teray tamaam ahkaam par lagee rahengee.
7jitna main teray ba-insaaf faislon kay baaray men seekhoonga utna hee diyaanatdaar dil say teree sitaaish karoonga.
8teray ahkaam par main har vaqt amal karoonga. mujhay pooree tarah tark na kar!
2
9naujavaan apnee raah ko kis tarah paak rakhay? is tarah ki teray kalaam kay mutaabiq zindagee guzaaray.
10main pooray dil say tera taalib raha hoon. mujhay apnay ahkaam say bhataknay na day.
11main nay tera kalaam apnay dil men mahfooz rakha hai taaki tera gunaah na karoon.
12ai rabb, teree hamd ho! mujhay apnay ahkaam sikha.
13apnay honton say main doosron ko teray munh kee tamaam hidaayaat sunaata hoon.
14main teray ahkaam kee raah say utna lutf’andoz hota hoon jitna ki har tarah kee daulat say.
15main teree hidaayaat men mahev-ay-khayaal rahoonga aur teree raahon ko takta rahoonga.
16main teray farmaanon say lutf’andoz hota hoon aur tera kalaam naheen bhoolta.
3
17apnay khaadim say bhalaaee kar taaki main zinda rahoon aur teray kalaam kay mutaabiq zindagee guzaaroon.
18meree aankhon ko khol taaki teree shareeat kay ajaaib dekhoon.
19duniya men main pardesee hee hoon. apnay ahkaam mujh say chhupaaay na rakh!
20meree jaan har vaqt teree hidaayaat kee aarzoo kartay kartay nidhaal ho rahee hai.
21too maghrooron ko daantta hai. un par laanat jo teray ahkaam say bhatak jaatay hain!
22mujhay logon kee tauheen aur tahqeer say rihaaee day, kyoonki main teray ahkaam kay taabay raha hoon.
23go buzurg meray khilaaf mansoobay baandhnay kay liyay baith gaay hain, tera khaadim teray ahkaam men mahev-ay-khayaal raheta hai.
24teray ahkaam say hee main lutf uthaata hoon, vahee meray musheer hain.
4
25meree jaan khaak men dab gaee hai. apnay kalaam kay mutaabiq meree jaan ko taazaadam kar.
26main nay apnee raahen bayaan keen to too nay meree sunee. mujhay apnay ahkaam sikha.
27mujhay apnay ahkaam kee raah samajhnay kay qaabil bana taaki teray ajaaib men mahev-ay-khayaal rahoon.
28meree jaan dukh kay maaray nidhaal ho gaee hai. mujhay apnay kalaam kay mutaabiq taqviyat day.
29fareb kee raah mujh say door rakh aur mujhay apnee shareeat say navaaz.
30main nay vafa kee raah ikhtiyaar karkay teray aaeen apnay saamnay rakhay hain.
31main teray ahkaam say lipta raheta hoon. ai rabb, mujhay sharminda na honay day.
32main teray farmaanon kee raah par daudta hoon, kyoonki too nay meray dil ko kushaadgee bakhshee hai.
5
33ai rabb, mujhay apnay aaeen kee raah sikha to main umr bhar un par amal karoonga.
34mujhay samajh ata kar taaki teree shareeat kay mutaabiq zindagee guzaaroon aur pooray dil say us kay taabay rahoon.
35apnay ahkaam kee raah par meree raahanumaaee kar, kyoonki yahee main pasand karta hoon.
36meray dil ko laalach men aanay na day balki usay apnay farmaanon kee taraf maail kar.
37meree aankhon ko baatil cheezon say pher lay, aur mujhay apnee raahon par sambhaal kar meree jaan ko taazaadam kar.
38jo vaada too nay apnay khaadim say kiya vah poora kar taaki log tera khauf maanen.
39jis rusvaaee say mujhay khauf hai us ka khatra door kar, kyoonki teray ahkaam achchhay hain.
40main teree hidaayaat ka shadeed aarzoomand hoon, apnee raastee say meree jaan ko taazaadam kar.
6
41ai rabb, teree shafqat aur vah najaat jis ka vaada too nay kiya hai mujh tak pahunche
42taaki main beizzatee karnay vaalay ko javaab day sakoon. kyoonki main teray kalaam par bharosa rakhta hoon.
43meray munh say sachchaaee ka kalaam na chheen, kyoonki main teray farmaanon kay intizaar men hoon.
44main har vaqt teree shareeat kee pairvee karoonga, ab say abad tak us men qaaim rahoonga.
45main khulay maidaan men chalta phiroonga, kyoonki teray aaeen ka taalib raheta hoon.
46main sharm kiay baghair baadshaahon kay saamnay teray ahkaam bayaan karoonga.
47main teray farmaanon say lutf’andoz hota hoon, vah mujhay piyaaray hain.
48main apnay haath teray farmaanon kee taraf uthaaoonga, kyoonki vah mujhay piyaaray hain. main teree hidaayaat men mahev-ay-khayaal rahoonga.
7
49us baat ka khayaal rakh jo too nay apnay khaadim say kee aur jis say too nay mujhay ummeed dilaaee hai.
50museebat men yahee tasallee ka baais raha hai ki tera kalaam meree jaan ko taazaadam karta hai.
51maghroor mera hadd say ziyaada mazaaq udaatay hain, lekin main teree shareeat say door naheen hota.
52ai rabb, main teray qadeem farmaan yaad karta hoon to mujhay tasallee miltee hai.
53bedeenon ko dekh kar main aag-bagoola ho jaata hoon, kyoonki unhon nay teree shareeat ko tark kiya hai.
54jis ghar men main pardesee hoon us men main teray ahkaam kay geet gaata raheta hoon.
55ai rabb, raat ko main tera naam yaad karta hoon, teree shareeat par amal karta raheta hoon.
56yah teree bakhshish hai ki main teray aaeen kee pairvee karta hoon.
8
57rabb meree meeraas hai. main nay teray farmaanon par amal karnay ka vaada kiya hai.
58main pooray dil say teree shafqat ka taalib raha hoon. apnay vaaday kay mutaabiq mujh par meharbaanee kar.
59main nay apnee raahon par dhyaan day kar teray ahkaam kee taraf qadam badhaaay hain.
60main naheen jhijakta balki bhaag kar teray ahkaam par amal karnay kee koshish karta hoon.
61bedeenon kay rasson nay mujhay jakad liya hai, lekin main teree shareeat naheen bhoolta.
62aadhee raat ko main jaag uthta hoon taaki teray raast farmaanon kay liyay tera shukr karoon.
63main un sab ka saathee hoon jo tera khauf maantay hain, un sab ka dost jo teree hidaayaat par amal kartay hain.
64ai rabb, duniya teree shafqat say maamoor hai. mujhay apnay ahkaam sikha!
9
65ai rabb, too nay apnay kalaam kay mutaabiq apnay khaadim say bhalaaee kee hai.
66mujhay saheeh imtiyaaz aur irfaan sikha, kyoonki main teray ahkaam par eemaan rakhta hoon.
67is say pahelay ki mujhay past kiya gaya main aavaara phirta tha, lekin ab main teray kalaam kay taabay raheta hoon.
68too bhala hai aur bhalaaee karta hai. mujhay apnay aaeen sikha!
69maghrooron nay jhoot bol kar mujh par keechad uchhaalee hai, lekin main pooray dil say teree hidaayaat kee faramaambardaaree karta hoon.
70un kay dil akad kar behiss ho gaay hain, lekin main teree shareeat say lutf’andoz hota hoon.
71meray liyay achchha tha ki mujhay past kiya gaya, kyoonki is tarah main nay teray ahkaam seekh liyay.
72jo shareeat teray munh say saadir huee hai vah mujhay sonay-chaandee kay hazaaron sikkon say ziyaada pasand hai.
10
73teray haathon nay mujhay bana kar mazboot bunyaad par rakh diya hai. mujhay samajh ata farma taaki teray ahkaam seekh loon.
74jo tera khauf maantay hain vah mujhay dekh kar khush ho jaaen, kyoonki main teray kalaam kay intizaar men raheta hoon.
75ai rabb, main nay jaan liya hai ki teray faislay raast hain. yah bhee teree vafaadaaree ka izhaar hai ki too nay mujhay past kiya hai.
76teree shafqat mujhay tasallee day, jis tarah too nay apnay khaadim say vaada kiya hai.
77mujh par apnay rahem ka izhaar kar taaki meree jaan men jaan aaay, kyoonki main teree shareeat say lutf’andoz hota hoon.
78jo maghroor mujhay jhoot say past kar rahay hain vah sharminda ho jaaen. lekin main teray farmaanon men mahev-ay-khayaal rahoonga.
79kaash jo tera khauf maantay aur teray ahkaam jaantay hain vah meray paas vaapas aaen!
80mera dil teray aaeen kee pairvee karnay men beilzaam rahay taaki meree rusvaaee na ho jaaay.
11
81meree jaan teree najaat kee aarzoo kartay kartay nidhaal ho rahee hai, main teray kalaam kay intizaar men hoon.
82meree aankhen teray vaaday kee raah dekhtay dekhtay dhundala rahee hain. too mujhay kab tasallee dega?
83main dhuen men sukdee huee mashk kee maanind hoon lekin teray farmaanon ko naheen bhoolta.
84teray khaadim ko mazeed kitnee der intizaar karna padega? too mera taaqqub karnay vaalon kee adaalat kab karega?
85jo maghroor teree shareeat kay taabay naheen hotay unhon nay mujhay phansaanay kay liyay gadhay khod liyay hain.
86teray tamaam ahkaam puravfa hain. meree madad kar, kyoonki vah jhoot ka sahaara lay kar mera taaqqub kar rahay hain.
87vah mujhay roo-ay-zameen par say mitaanay kay qareeb hee hain, lekin main nay teray aaeen ko tark naheen kiya.
88apnee shafqat ka izhaar karkay meree jaan ko taazaadam kar taaki teray munh kay farmaanon par amal karoon.
12
89ai rabb, tera kalaam abad tak aasmaan par qaaim-o-daaim hai.
90teree vafaadaaree pusht-dar-pusht rahetee hai. too nay zameen kee bunyaad rakhee, aur vah vaheen kee vaheen barqaraar rahetee hai.
91aaj tak aasmaan-o-zameen teray farmaanon ko poora karnay kay liyay haazir rahetay hain, kyoonki tamaam cheezen teree khidmat karnay kay liyay banaaee gaee hain.
92agar teree shareeat meree khushee na hotee to main apnee museebat men halaak ho gaya hota.
93main teree hidaayaat kabhee naheen bhooloonga, kyoonki un hee kay zareeay too meree jaan ko taazaadam karta hai.
94main tera hee hoon, mujhay bacha! kyoonki main teray ahkaam ka taalib raha hoon.
95bedeen meree taak men baith gaay hain taaki mujhay maar daalen, lekin main teray aaeen par dhyaan deta rahoonga.
96main nay dekha hai ki har kaamil cheez kee hadd hotee hai, lekin teray farmaan kee koee hadd naheen hotee.
13
97teree shareeat mujhay kitnee piyaaree hai! din bhar main us men mahev-ay-khayaal raheta hoon.
98tera farmaan mujhay meray dushmanon say ziyaada daanishmand bana deta hai, kyoonki vah hamesha tak mera khazaana hai.
99mujhay apnay tamaam ustaadon say ziyaada samajh haasil hai, kyoonki main teray aaeen men mahev-ay-khayaal raheta hoon.
100mujhay buzurgon say ziyaada samajh haasil hai, kyoonki main vafaadaaree say teray ahkaam kee pairvee karta hoon.
101main nay har buree raah par qadam rakhnay say gurez kiya hai taaki teray kalaam say lipta rahoon.
102main teray farmaanon say door naheen hua, kyoonki too hee nay mujhay taaleem dee hai.
103tera kalaam kitna lazeez hai, vah meray munh men shahed say ziyaada meetha hai.
104teray ahkaam say mujhay samajh haasil hotee hai, is liyay main jhoot kee har raah say nafrat karta hoon.
14
105tera kalaam meray paaon kay liyay charaagh hai jo meree raah ko raushan karta hai.
106main nay qasam khaaee hai ki teray raast farmaanon kee pairvee karoonga, aur main yah vaada poora bhee karoonga.
107mujhay bahut past kiya gaya hai. ai rabb, apnay kalaam kay mutaabiq meree jaan ko taazaadam kar.
108ai rabb, meray munh kee razaakaaraana qurbaaniyon ko pasand kar aur mujhay apnay aaeen sikha!
109meree jaan hamesha khatray men hai, lekin main teree shareeat naheen bhoolta.
110bedeenon nay meray liyay phanda tayyaar kar rakha hai, lekin main teray farmaanon say naheen bhatka.
111teray ahkaam meree abdee meeraas ban gaay hain, kyoonki un say mera dil khushee say uchhalta hai.
112main nay apna dil teray ahkaam par amal karnay kee taraf maail kiya hai, kyoonki is ka ajr abdee hai.
15
113main dodilon say nafrat lekin teree shareeat say muhabbat karta hoon.
114too meree panaahgaah aur meree dhaal hai, main teray kalaam kay intizaar men raheta hoon.
115ai badkaaro, mujh say door ho jaao, kyoonki main apnay khuda kay ahkaam say lipta rahoonga.
116apnay farmaan kay mutaabiq mujhay sambhaal taaki zinda rahoon. meree aas tootnay na day taaki sharminda na ho jaaoon.
117mera sahaara ban taaki bach kar har vaqt teray aaeen ka lihaaz rakhoon.
118too un sab ko radd karta hai jo teray ahkaam say bhatkay phirtay hain, kyoonki un kee dhokebaazee fareb hee hai.
119too zameen kay tamaam bedeenon ko naapaak chaandee say khaarij kee huee mail kee tarah phaink kar nest kar deta hai, is liyay teray farmaan mujhay piyaaray hain.
120mera jism tujh say dahshat kha kar thartharaata hai, aur main teray faislon say darta hoon.
16
121main nay raast aur ba-insaaf kaam kiya hai, chunaanchay mujhay un kay havaalay na kar jo mujh par zulm kartay hain.
122apnay khaadim kee khushhaalee ka zaamin ban kar maghrooron ko mujh par zulm karnay na day.
123meree aankhen teree najaat aur teray raast vaaday kee raah dekhtay dekhtay rah gaee hain.
124apnay khaadim say tera sulook teree shafqat kay mutaabiq ho. mujhay apnay ahkaam sikha.
125main tera hee khaadim hoon. mujhay fahem ata farma taaki teray aaeen kee pooree samajh aaay.
126ab vaqt a gaya hai ki rabb qadam uthaaay, kyoonki logon nay teree shareeat ko tod daala hai.
127is liyay main teray ahkaam ko sonay balki khaalis sonay say ziyaada piyaar karta hoon.
128is liyay main ehatiyaat say teray tamaam aaeen kay mutaabiq zindagee guzaarta hoon. main har farebdih raah say nafrat karta hoon.
17
129teray ahkaam taajjub’angez hain, is liyay meree jaan un par amal kartee hai.
130teray kalaam ka inkishaaf raushnee bakhshta aur saadaalauh ko samajh ata karta hai.
131main teray farmaanon kay liyay itna piyaasa hoon ki munh khol kar haamp raha hoon.
132meree taraf rujoo farma aur mujh par vahee meharbaanee kar jo too un sab par karta hai jo teray naam say piyaar kartay hain.
133apnay kalaam say meray qadam mazboot kar, kisee bhee gunaah ko mujh par hukoomat na karnay day.
134fidya day kar mujhay insaan kay zulm say chhutkaara day taaki main teray ahkaam kay taabay rahoon.
135apnay chiharay ka noor apnay khaadim par chamka aur mujhay apnay ahkaam sikha.
136meree aankhon say aansooon kee nadiyaan bah rahee hain, kyoonki log teree shareeat kay taabay naheen rahetay.
18
137ai rabb, too raast hai, aur teray faislay durust hain.
138too nay raastee aur badee vafaadaaree kay saath apnay farmaan jaaree kiay hain.
139meree jaan ghairat kay baais tabaah ho gaee hai, kyoonki meray dushman teray farmaan bhool gaay hain.
140tera kalaam aazma kar paak-saaf saabit hua hai, tera khaadim usay piyaar karta hai.
141mujhay zaleel aur haqeer jaana jaata hai, lekin main teray aaeen naheen bhoolta.
142teree raastee abdee hai, aur teree shareeat sachchaaee hai.
143museebat aur pareshaanee mujh par ghaalib a gaee hain, lekin main teray ahkaam say lutf’andoz hota hoon.
144teray ahkaam abad tak raast hain. mujhay samajh ata farma taaki main jeeta rahoon.
19
145main pooray dil say pukaarta hoon, “ai rabb, meree sun! main teray aaeen kay mutaabiq zindagee guzaaroonga.”
146main pukaarta hoon, “mujhay bacha! main teray ahkaam kee pairvee karoonga.”
147pau phatnay say pahelay pahelay main uth kar madad kay liyay pukaarta hoon. main teray kalaam kay intizaar men hoon.
148raat kay vaqt hee meree aankhen khul jaatee hain taaki teray kalaam par ghaur-o-khauz karoon.
149apnee shafqat kay mutaabiq meree aavaaz sun! ai rabb, apnay farmaanon kay mutaabiq meree jaan ko taazaadam kar.
150jo chaalaakee say mera taaqqub kar rahay hain vah qareeb pahunch gaay hain. lekin vah teree shareeat say intihaaee door hain.
151ai rabb, too qareeb hee hai, aur teray ahkaam sachchaaee hain.
152badee der pahelay mujhay teray farmaanon say maaloom hua hai ki too nay unhen hamesha kay liyay qaaim rakha hai.
20
153meree museebat ka khayaal karkay mujhay bacha! kyoonki main teree shareeat naheen bhoolta.
154adaalat men meray haq men lad kar mera ivzaana day taaki meree jaan chhoot jaaay. apnay vaaday kay mutaabiq meree jaan ko taazaadam kar.
155najaat bedeenon say bahut door hai, kyoonki vah teray ahkaam kay taalib naheen hotay.
156ai rabb, too mut’addid tareeqon say apnay rahem ka izhaar karta hai. apnay aaeen kay mutaabiq meree jaan ko taazaadam kar.
157mera taaqqub karnay vaalon aur meray dushmanon kee badee taadaad hai, lekin main teray ahkaam say door naheen hua.
158bevafaaon ko dekh kar mujhay ghin aatee hai, kyoonki vah teray kalaam kay mutaabiq zindagee naheen guzaartay.
159dekh, mujhay teray ahkaam say piyaar hai. ai rabb, apnee shafqat kay mutaabiq meree jaan ko taazaadam kar.
160teray kalaam ka lubb-ay-lubaab sachchaaee hai, teray tamaam raast farmaan abad tak qaaim hain.
21
161sardaar bilaavajah mera peechha kartay hain, lekin mera dil teray kalaam say hee darta hai.
162main teray kalaam kee khushee us kee tarah manaata hoon jisay kasrat ka maal-ay-ghaneemat mil gaya ho.
163main jhoot say nafrat karta balki ghin khaata hoon, lekin teree shareeat mujhay piyaaree hai.
164main din men saat baar teree sitaaish karta hoon, kyoonki teray ahkaam raast hain.
165jinhen shareeat piyaaree hai unhen bada sukoon haasil hai, vah kisee bhee cheez say thokar kha kar naheen girengay.
166ai rabb, main teree najaat kay intizaar men rahetay huay teray ahkaam kee pairvee karta hoon.
167meree jaan teray farmaanon say liptee rahetee hai, vah usay nihaayat piyaaray hain.
168main teray aaeen aur hidaayaat kee pairvee karta hoon, kyoonki meree tamaam raahen teray saamnay hain.
22
169ai rabb, meree aahen teray saamnay aaen, mujhay apnay kalaam kay mutaabiq samajh ata farma.
170meree iltijaaen teray saamnay aaen, mujhay apnay kalaam kay mutaabiq chhuda!
171meray honton say hamd-o-sana phoot niklay, kyoonki too mujhay apnay ahkaam sikhaata hai.
172meree zabaan teray kalaam kee madahsaraaee karay, kyoonki teray tamaam farmaan raast hain.
173tera haath meree madad karnay kay liyay tayyaar rahay, kyoonki main nay teray ahkaam ikhtiyaar kiay hain.
174ai rabb, main teree najaat ka aarzoomand hoon, teree shareeat say lutf’andoz hota hoon.
175meree jaan zinda rahay taaki teree sitaaish kar sakay. teray aaeen meree madad karen.
176main bhatkee huee bhed kee tarah aavaara phir raha hoon. apnay khaadim ko talaash kar, kyoonki main teray ahkaam naheen bhoolta.