Zaboor 12

madad kay liyay duaa

¹daaood ka zaboor. mooseeqee kay raahanuma kay liyay. tarz : shameeneet.

ai rabb, madad farma! kyoonki eemaandaar khatm ho gaay hain. diyaanatdaar insaanon men say mit gaay hain.

²aapas men sab jhoot boltay hain. un kee zabaan par chiknee-chupdee baaten hotee hain jabki dil men kuchh aur hee hota hai.

³rabb tamaam chiknee-chupdee aur shekheebaaz zabaanon ko kaat daalay!

⁴vah un sab ko mita day jo kahetay hain, “ham apnee laaiq zabaan kay baais taaqatvar hain. hamaaray hont hamen sahaara detay hain to kaun hamaara maalik hoga? koee naheen!”

⁵lekin rabb farmaata hai, “naachaaron par tumhaaray zulm kee khabar aur zarooratmandon kee karaahatee aavaazen meray saamnay aaee hain. ab main uth kar unhen un say chhutkaara doonga jo un kay khilaaf phunkaaratay hain.”

⁶rabb kay farmaan paak hain, vah bhattee men saat baar saaf kee gaee chaandee kee maanind khaalis hain.

⁷ai rabb, too hee unhen mahfooz rakhega, too hee unhen abad tak is nasal say bachaaay rakhega,

⁸go bedeen aazaadee say idhar udhar phirtay hain, aur insaanon kay darmiyaan kameenaapan ka raaj hai.