Zaboor 122
yarooshalam par barkat
1daaood ka ziyaarat ka geet.
main un say khush hua jinhon nay mujh say kaha, “aao, ham rabb kay ghar chalen.”
2ai yarooshalam, ab hamaaray paaon teray darvaazon men khaday hain.
3yarooshalam shaher yoon banaaya gaya hai ki us kay tamaam hissay mazbootee say ek doosray kay saath juday huay hain.
4vahaan qabeelay, haan rabb kay qabeelay haazir hotay hain taaki rabb kay naam kee sitaaish karen jis tarah israaeel ko farmaaya gaya hai.
5kyoonki vahaan takht adaalat karnay kay liyay lagaaay gaay hain, vahaan daaood kay gharaanay kay takht hain.
6yarooshalam kay liyay salaamatee maango! “jo tujh say piyaar kartay hain vah sukoon paaen.
7teree faseel men salaamatee aur teray mahelon men sukoon ho.”
8apnay bhaaiyon aur hamsaaiyon kee khaatir main kahoonga, “teray andar salaamatee ho!”
9rabb hamaaray khuda kay ghar kee khaatir main teree khushhaalee ka taalib rahoonga.