Zaboor 126

rabb apnay qaidiyon ko rihaaee deta hai

¹ziyaarat ka geet.

jab rabb nay siyyoon ko bahaal kiya to aisa lag raha tha ki ham khavaab dekh rahay hain.

²tab hamaara munh hansee-khushee say bhar gaya, aur hamaaree zabaan shaadmaanee kay naaray lagaanay say ruk na sakee. tab deegar qaumon men kaha gaya, “rabb nay un kay liyay zabardast kaam kiya hai.”

³rabb nay vaaqaee hamaaray liyay zabardast kaam kiya hai. ham kitnay khush thay, kitnay khush!

⁴ai rabb, hamen bahaal kar. jis tarah mausam-ay-barsaat men dasht-ay-najab kay khushk naalay paanee say bhar jaatay hain usee tarah hamen bahaal kar.

⁵jo aansoo baha baha kar beej boen vah khushee kay naaray laga kar fasal kaatengay.

⁶vah rotay huay beej bonay kay liyay nikalengay, lekin jab fasal pak jaaay to khushee kay naaray laga kar poolay uthaaay apnay ghar lautengay.