Zaboor 13
madad kay liyay duaa
1daaood ka zaboor. mooseeqee kay raahanuma kay liyay.
ai rabb, kab tak? kya too mujhay abad tak bhoola rahega? too kab tak apna chihara mujh say chhupaaay rakhega?
2meree jaan kab tak pareshaaniyon men mubtala rahay, mera dil kab tak roz-ba-roz dukh uthaata rahay? mera dushman kab tak mujh par ghaalib rahega?
3ai rabb meray khuda, mujh par nazar daal kar meree sun! meree aankhon ko raushan kar, varna main maut kee neend so jaaoonga.
4tab mera dushman kahega, “main us par ghaalib a gaya hoon!” aur meray mukhaalif shaadiyaana bajaaengay ki main hil gaya hoon.
5lekin main teree shafqat par bharosa rakhta hoon, mera dil teree najaat dekh kar khushee manaaega.
6main rabb kee tamjeed men geet gaaoonga, kyoonki us nay mujh par ehsaan kiya hai.