Zaboor 130

badee museebat say rihaaee kee dua (tauba ka chhata zaboor)

¹ziyaarat ka geet.

ai rabb, main tujhay gaheraaiyon say pukaarta hoon.

²ai rabb, meree aavaaz sun! kaan laga kar meree iltijaaon par dhyaan day!

³ai rabb, agar too hamaaray gunaahon ka hisaab karay to kaun qaaim rahega? koee bhee naheen!

⁴lekin tujh say muaafee haasil hotee hai taaki tera khauf maana jaaay.

⁵main rabb kay intizaar men hoon, meree jaan shiddat say intizaar kartee hai. main us kay kalaam say ummeed rakhta hoon.

⁶paheredaar jis shiddat say pau phatnay kay intizaar men rahetay hain, meree jaan us say bhee ziyaada shiddat kay saath, haan ziyaada shiddat kay saath rabb kee muntazir rahetee hai.

⁷ai israaeel, rabb kee raah dekhta rah! kyoonki rabb kay paas shafqat aur fidya ka thos band-o-bast hai.

⁸vah israaeel kay tamaam gunaahon ka fidya day kar usay najaat dega.