Zaboor 132
daaood ka gharaana aur siyyoon par maqdis
1ziyaarat ka geet.
ai rabb, daaood ka khayaal rakh, us kee tamaam museebaton ko yaad kar.
2us nay qasam kha kar rabb say vaada kiya aur yaaqoob kay qavee khuda kay huzoor mannat maanee,
3“na main apnay ghar men daakhil hoonga, na bistar par letoonga,
4na main apnee aankhon ko sonay doonga, na apnay papoton ko oonghnay doongaa
5jab tak rabb kay liyay maqaam aur yaaqoob kay soormay kay liyay sukoonatgaah na milay.”
6ham nay ifraata men ahd kay sandooq kee khabar sunee aur yaar kay khulay maidaan men usay pa liya.
7aao, ham us kee sukoonatgaah men daakhil ho kar us kay paaon kee chaukee kay saamnay sijda karen.
8ai rabb, uth kar apnee aaraamgaah kay paas a, too aur ahd ka sandooq jo teree qudrat ka izhaar hai.
9teray imaam raastee say mulabbas ho jaaen, aur teray eemaandaar khushee kay naaray lagaaen.
10ai allaah, apnay khaadim daaood kee khaatir apnay masah kiay huay banday kay chiharay ko radd na kar.
11rabb nay qasam kha kar daaood say vaada kiya hai, aur vah us say kabhee naheen phirega, “main teree aulaad men say ek ko teray takht par bithaaoonga.
12agar teray betay meray ahd say vafaadaar rahen aur un ahkaam kee pairvee karen jo main unhen sikhaaoonga to un kay betay bhee hamesha tak teray takht par baithengay.”
13kyoonki rabb nay koh-ay-siyyoon ko chun liya hai, aur vahee vahaan sukoonat karnay ka aarzoomand tha.
14us nay farmaaya, “yah hamesha tak meree aaraamgaah hai, aur yahaan main sukoonat karoonga, kyoonki main is ka aarzoomand hoon.
15main siyyoon kee khuraak ko kasrat kee barkat day kar us kay ghareebon ko rotee say ser karoonga.
16main us kay imaamon ko najaat say mulabbas karoonga, aur us kay eemaandaar khushee say zordaar naaray lagaaengay.
17yahaan main daaood kee taaqat badha doongaa [a] lafzee tarjuma : main daaood ka seeng phootnay doonga. , aur yahaan main nay apnay masah kiay huay khaadim kay liyay charaagh tayyaar kar rakha hai.
18main us kay dushmanon ko sharmindagee say mulabbas karoonga jabki us kay sar ka taaj chamakta rahega.”