Zaboor 135

allaah kee parastish

¹rabb kee hamd ho! rabb kay naam kee sitaaish karo! us kee tamjeed karo, ai rabb kay tamaam khaadimo,

²jo rabb kay ghar men, hamaaray khuda kee baargaahon men khaday ho.

³rabb kee hamd karo, kyoonki rabb bhala hai. us kay naam kee madahsaraaee karo, kyoonki vah piyaara hai.

⁴kyoonki rabb nay yaaqoob ko apnay liyay chun liya, israaeel ko apnee milkiyat bana liya hai.

⁵haan, main nay jaan liya hai ki rabb azeem hai, ki hamaara rabb deegar tamaam maaboodon say ziyaada azeem hai.

⁶rabb jo jee chaahay karta hai, khwaah aasmaan par ho ya zameen par, khwaah samundaron men ho ya gaheraaiyon men kaheen bhee ho.

⁷vah zameen kee intiha say baadal chadhnay deta aur bijlee baarish kay liyay paida karta hai, vah hava apnay godaamon say nikaal laata hai.

⁸misr men us nay insaan-o-haivaan kay tamaam pahelauthon ko maar daala.

⁹ai misr, us nay apnay ilaahee nishaan aur mojizaat teray darmiyaan hee kiay. tab firaaun aur us kay tamaam mulaazim un ka nishaana ban gaay.

¹⁰us nay mut’addid qaumon ko shikast day kar taaqatvar baadshaahon ko maut kay ghaat utaar diya.

¹¹amoriyon ka baadshaah seehon, basan ka baadshaah oj aur mulk-ay-kan’aan kee tamaam saltanaten na raheen.

¹²us nay un ka mulk israaeel ko day kar farmaaya ki aainda yah meree qaum kee mauroosee milkiyat hoga.

¹³ai rabb, tera naam abdee hai. ai rabb, tujhay pusht-dar-pusht yaad kiya jaaega.

¹⁴kyoonki rabb apnee qaum ka insaaf karkay apnay khaadimon par taras khaaega.

¹⁵deegar qaumon kay but sonay-chaandee kay hain, insaan kay haath nay unhen banaaya.

¹⁶un kay munh hain lekin vah bol naheen saktay, un kee aankhen hain lekin vah dekh naheen saktay.

¹⁷un kay kaan hain lekin vah sun naheen saktay, un kay munh men saans hee naheen hotee.

¹⁸jo but banaatay hain vah un kee maanind ho jaaen, jo un par bharosa rakhtay hain vah un jaisay behiss-o-harkat ho jaaen.

¹⁹ai israaeel kay gharaanay, rabb kee sitaaish kar. ai haaroon kay gharaanay, rabb kee tamjeed kar.

²⁰ai laavee kay gharaanay, rabb kee hamd-o-sana kar. ai rabb ka khauf maannay vaalo, rabb kee sitaaish karo.

²¹siyyoon say rabb kee hamd ho. us kee hamd ho jo yarooshalam men sukoonat karta hai. rabb kee hamd ho