Zaboor 136
takhleeq aur qaum kee taareekh men allaah kay mojize
1rabb ka shukr karo, kyoonki vah bhala hai, aur us kee shafqat abdee hai.
2khudaaon kay khuda ka shukr karo, kyoonki us kee shafqat abdee hai.
3maalikon kay maalik ka shukr karo, kyoonki us kee shafqat abdee hai.
4jo akela hee azeem mojizay karta hai us ka shukr karo, kyoonki us kee shafqat abdee hai.
5jis nay hikmat kay saath aasmaan banaaya us ka shukr karo, kyoonki us kee shafqat abdee hai.
6jis nay zameen ko mazbootee say paanee kay oopar laga diya us ka shukr karo, kyoonki us kee shafqat abdee hai.
7jis nay aasmaan kee raushniyon ko khalaq kiya us ka shukr karo, kyoonki us kee shafqat abdee hai.
8jis nay sooraj ko din kay vaqt hukoomat karnay kay liyay banaaya us ka shukr karo, kyoonki us kee shafqat abdee hai.
9jis nay chaand aur sitaaron ko raat kay vaqt hukoomat karnay kay liyay banaaya us ka shukr karo, kyoonki us kee shafqat abdee hai.
10jis nay misr men pahelauthon ko maar daala us ka shukr karo, kyoonki us kee shafqat abdee hai.
11jo israaeel ko misriyon men say nikaal laaya us ka shukr karo, kyoonki us kee shafqat abdee hai.
12jis nay us vaqt badee taaqat aur qudrat ka izhaar kiya us ka shukr karo, kyoonki us kee shafqat abdee hai.
13jis nay baher-ay-qulzum ko do hisson men taqseem kar diya us ka shukr karo, kyoonki us kee shafqat abdee hai.
14jis nay israaeel ko us kay beech men say guzarnay diya us ka shukr karo, kyoonki us kee shafqat abdee hai.
15jis nay firaaun aur us kee fauj ko baher-ay-qulzum men baha kar gharq kar diya us ka shukr karo, kyoonki us kee shafqat abdee hai.
16jis nay registaan men apnee qaum kee qiyaadat kee us ka shukr karo, kyoonki us kee shafqat abdee hai.
17jis nay baday baadshaahon ko shikast dee us ka shukr karo, kyoonki us kee shafqat abdee hai.
18jis nay taaqatvar baadshaahon ko maar daala us ka shukr karo, kyoonki us kee shafqat abdee hai.
19jis nay amoriyon kay baadshaah seehon ko maut kay ghaat utaara us ka shukr karo, kyoonki us kee shafqat abdee hai.
20jis nay basan kay baadshaah oj ko halaak kar diya us ka shukr karo, kyoonki us kee shafqat abdee hai.
21jis nay un ka mulk israaeel ko meeraas men diya us ka shukr karo, kyoonki us kee shafqat abdee hai.
22jis nay un ka mulk apnay khaadim israaeel kee mauroosee milkiyat banaaya us ka shukr karo, kyoonki us kee shafqat abdee hai.
23jis nay hamaara khayaal kiya jab ham khaak men dab gaay thay us ka shukr karo, kyoonki us kee shafqat abdee hai.
24jis nay hamen un kay qabzay say chhudaaya jo ham par zulm kar rahay thay us ka shukr karo, kyoonki us kee shafqat abdee hai.
25jo tamaam jaandaaron ko khuraak muhayya karta hai us ka shukr karo, kyoonki us kee shafqat abdee hai.
26aasmaan kay khuda ka shukr karo, kyoonki us kee shafqat abdee hai.