Zaboor 138
allaah kee madad kay liyay shukrguzaaree
1daaood ka zaboor.
ai rabb, main pooray dil say teree sitaaish karoonga, maaboodon kay saamnay hee teree tamjeed karoonga.
2main teree muqaddas sukoonatgaah kee taraf rukh karkay sijda karoonga, teree meharbaanee aur vafaadaaree kay baais tera shukr karoonga. kyoonki too nay apnay naam aur kalaam ko tamaam cheezon par sarfaraaz kiya hai.
3jis din main nay tujhay pukaara too nay meree sun kar meree jaan ko badee taqviyat dee.
4ai rabb, duniya kay tamaam hukmaraan teray munh kay farmaan sun kar tera shukr karen.
5vah rabb kee raahon kee madahsaraaee karen, kyoonki rabb ka jalaal azeem hai.
6kyoonki go rabb bulandiyon par hai vah pastahaal ka khayaal karta aur maghrooron ko door say hee pahechaan leta hai.
7jab kabhee museebat mera daaman naheen chhodtee to too meree jaan ko taazaadam karta hai, too apna dahena haath badha kar mujhay meray dushmanon kay taish say bachaata hai.
8rabb meree khaatir badla lega. ai rabb, teree shafqat abdee hai. unhen na chhod jin ko teray haathon nay banaaya hai