Zaboor 139
allaah sab kuchh jaanta aur har jagah maujood hai
1daaood ka zaboor. mooseeqee kay raahanuma kay liyay.
ai rabb, too mera muaaina karta aur mujhay khoob jaanta hai.
2mera uthna baithna tujhay maaloom hai, aur too door say hee meree soch samajhta hai.
3too mujhay jaanchta hai, khwaah main raastay men hoon ya aaraam karoon. too meree tamaam raahon say vaaqif hai.
4kyoonki jab bhee koee baat meree zabaan par aaay too ai rabb pahelay hee us ka poora ilm rakhta hai.
5too mujhay chaaron taraf say gheray rakhta hai, tera haath meray oopar hee raheta hai.
6is ka ilm itna hairaankun aur azeem hai ki main isay samajh naheen sakta.
7main teray rooh say kahaan bhaag jaaoon, teray chiharay say kahaan faraar ho jaaoon?
8agar aasmaan par chadh jaaoon to too vahaan maujood hai, agar utar kar apna bistar paataal men bichhaaoon to too vahaan bhee hai.
9go main tuloo-ay-subah kay paron par ud kar samundar kee doortareen hadd par ja basoon,
10vahaan bhee tera haath meree qiyaadat karega, vahaan bhee tera dahena haath mujhay thaamay rakhega.
11agar main kahoon, “taareekee mujhay chhupa day, aur meray ird-gird kee raushnee raat men badal jaaay,” to bhee koee farq naheen padega.
12teray saamnay taareekee bhee taareek naheen hotee, teray huzoor raat din kee tarah raushan hotee hai balki raushnee aur andhera ek jaisay hotay hain.
13kyoonki too nay mera baatin banaaya hai, too nay mujhay maan kay pet men tashkeel diya hai.
14main tera shukr karta hoon ki mujhay jalaalee aur mojizaana taur say banaaya gaya hai. teray kaam hairat’angez hain, aur meree jaan yah khoob jaantee hai.
15mera dhaancha tujh say chhupa naheen tha jab mujhay posheedgee men banaaya gaya, jab mujhay zameen kee gaheraaiyon men tashkeel diya gaya.
16teree aankhon nay mujhay us vaqt dekha jab meray jism kee shakl abhee naamukammal thee. jitnay bhee din meray liyay muqarrar thay vah sab teree kitaab men us vaqt darj thay, jab ek bhee naheen guzra tha.
17ai allaah, teray khayaalaat samajhna meray liyay kitna mushkil hai! un kee kul taadaad kitnee azeem hai.
18agar main unhen gin sakta to vah ret say ziyaada hotay. main jaag uthta hoon to teray hee saath hota hoon.
19ai allaah, kaash too bedeen ko maar daalay, ki khoonkhaar mujh say door ho jaaen.
20vah fareb say tera zikr kartay hain, haan teray mukhaalif jhoot boltay hain.
21ai rabb, kya main un say nafrat na karoon jo tujh say nafrat kartay hain? kya main un say ghin na khaaoon jo teray khilaaf uthay hain?
22yaqeenan main un say sakht nafrat karta hoon. vah meray dushman ban gaay hain.
23ai allaah, mera muaaina karkay meray dil ka haal jaan lay, mujhay jaanch kar meray bechain khayaalaat ko jaan lay.
24main nuqsaandih raah par to naheen chal raha? abdee raah par meree qiyaadat kar