Zaboor 140

dushman say rihaaee kee duaa

¹daaood ka zaboor. mooseeqee kay raahanuma kay liyay.

ai rabb, mujhay shareeron say chhuda aur zaalimon say mahfooz rakh.

²dil men vah buray mansoobay baandhtay, rozaana jang chhedtay hain.

³un kee zabaan saamp kee zabaan jaisee tez hai, aur un kay honton men saamp ka zaher hai. (silaah)

⁴ai rabb, mujhay bedeen kay haathon say mahfooz rakh, zaalim say mujhay bachaaay rakh, un say jo meray paaon ko thokar khilaanay kay mansoobay baandh rahay hain.

⁵maghrooron nay meray raastay men phanda aur rassay chhupaaay hain, unhon nay jaal bichha kar raastay kay kinaaray kinaaray mujhay pakadnay kay phanday lagaaay hain. (silaah)

⁶main rabb say kaheta hoon, “too hee mera khuda hai, meree iltijaaon kee aavaaz sun!”

⁷ai rabb qaadir-ay-mutlaq, ai meree qavee najaat! jang kay din too apnee dhaal say meray sar kee hifaazat karta hai.

⁸ai rabb, bedeen ka laalach poora na kar. us ka iraada kaamyaab honay na day, aisa na ho ki yah log sarfaraaz ho jaaen. (silaah)

⁹unhon nay mujhay gher liya hai, lekin jo aafat un kay hont mujh par laana chaahatay hain vah un kay apnay saron par aaay!

¹⁰dahektay koilay un par barsen, aur unhen aag men, athaah gadhon men phainka jaaay taaki aainda kabhee na uthen.

¹¹tuhamat lagaanay vaala mulk men qaaim na rahay, aur buraaee zaalim ko maar maar kar us ka peechha karay.

¹²main jaanta hoon ki rabb adaalat men museebatzada ka difa karega. vahee zarooratmand ka insaaf karega.

¹³yaqeenan raastbaaz teray naam kee sitaaish karengay, aur diyaanatdaar teray huzoor basengay.