Zaboor 141

hifaazat kee guzaarish

¹daaood ka zaboor.

ai rabb, main tujhay pukaar raha hoon, meray paas aanay men jaldee kar! jab main tujhay aavaaz deta hoon to meree faryaad par dhyaan day!

²meree dua teray huzoor bakhoor kee qurbaanee kee tarah qabool ho, meray teree taraf uthaaay huay haath shaam kee ghalla kee nazar kee tarah manzoor hon.

³ai rabb, meray munh par pahera bitha, meray honton kay darvaazay kee nigahbaanee kar.

⁴meray dil ko ghalat baat kee taraf maail na honay day, aisa na ho ki main badkaaron kay saath mil kar buray kaam men mulavvas ho jaaoon aur un kay lazeez khaanon men shirkat karoon.

⁵raastbaaz shafqat say mujhay maaray aur mujhay tambeeh karay. mera sar is say inkaar naheen karega, kyoonki yah us kay liyay shifaabakhsh tel kee maanind hoga. lekin main har vaqt shareeron kee harkaton kay khilaaf dua karta hoon.

⁶jab vah gir kar us chataan kay haath men aaengay jo un ka munsif hai to vah meree baaton par dhyaan dengay, aur unhen samajh aaegee ki vah kitnee piyaaree hain.

⁷ai allaah, hamaaree haddiyaan us zameen kee maanind hain jis par kisee nay itnay zor say hal chalaaya hai ki dhelay ud kar idhar udhar bikhar gaay hain. hamaaree haddiyaan paataal kay munh tak bikhar gaee hain.

⁸ai rabb qaadir-ay-mutlaq, meree aankhen tujh par lagee rahetee hain, aur main tujh men panaah leta hoon. mujhay maut kay havaalay na kar.

⁹mujhay us jaal say mahfooz rakh jo unhon nay mujhay pakadnay kay liyay bichhaaya hai. mujhay badkaaron kay phandon say bachaaay rakh.

¹⁰bedeen mil kar un kay apnay jaalon men ulajh jaaen jabki main bach kar aagay nikloon.