Zaboor 143

bachaao aur qiyaadat kee guzaarish (tauba ka saatvaan zaboor)

¹daaood ka zaboor.

ai rabb, meree dua sun, meree iltijaaon par dhyaan day. apnee vafaadaaree aur raastee kee khaatir meree sun!

²apnay khaadim ko apnee adaalat men na la, kyoonki teray huzoor koee bhee jaandaar raastbaaz naheen thaher sakta.

³kyoonki dushman nay meree jaan ka peechha karkay usay khaak men kuchal diya hai. us nay mujhay un logon kee tarah taareekee men basa diya hai jo baday arsay say murda hain.

⁴meray andar meree rooh nidhaal hai, meray andar mera dil dahshat kay maaray behiss-o-harkat ho gaya hai.

⁵main qadeem zamaanay kay din yaad karta aur teray kaamon par ghaur-o-khauz karta hoon. jo kuchh teray haathon nay kiya us men main mahev-ay-khayaal raheta hoon.

⁶main apnay haath teree taraf uthaata hoon, meree jaan khushk zameen kee tarah teree piyaasee hai. (silaah)

⁷ai rabb, meree sunnay men jaldee kar. meree jaan to khatm honay vaalee hai. apna chihara mujh say chhupaaay na rakh, varna main gadhay men utarnay vaalon kee maanind ho jaaoonga.

⁸subah kay vaqt mujhay apnee shafqat kee khabar suna, kyoonki main tujh par bharosa rakhta hoon. mujhay vah raah dikha jis par mujhay jaana hai, kyoonki main tera hee aarzoomand hoon.

⁹ai rabb, mujhay meray dushmanon say chhuda, kyoonki main tujh men panaah leta hoon.

¹⁰mujhay apnee marzee pooree karna sikha, kyoonki too mera khuda hai. tera nek rooh hamvaar zameen par meree raahanumaaee karay.

¹¹ai rabb, apnay naam kee khaatir meree jaan ko taazaadam kar. apnee raastee say meree jaan ko museebat say bacha.

¹²apnee shafqat say meray dushmanon ko halaak kar. jo bhee mujhay tang kar rahay hain unhen tabaah kar! kyoonki main tera khaadim hoon.