Zaboor 144
najaat aur khushhaalee kee duaa
1daaood ka zaboor.
rabb meree chataan kee hamd ho, jo meray haathon ko ladnay aur meree ungaliyon ko jang karnay kee tarbiyat deta hai.
2vah meree shafqat, mera qil’a, mera najaatadihanda aur meree dhaal hai. usee men main panaah leta hoon, aur vahee deegar aqvaam ko meray taabay kar deta hai.
3ai rabb, insaan kaun hai ki too us ka khayaal rakhay? aadamzaad kaun hai ki too us ka lihaaz karay?
4insaan dam bhar ka hee hai, us kay din tezee say guzarnay vaalay saay kee maanind hain.
5ai rabb, apnay aasmaan ko jhuka kar utar a! pahaadon ko chhoo taaki vah dhuaan chhoden.
6bijlee bhej kar unhen muntashir kar, apnay teer chala kar unhen darham-barham kar.
7apna haath bulandiyon say neechay badha aur mujhay chhuda kar paanee kee gaheraaiyon aur pardesiyon kay haath say bacha,
8jin ka munh jhoot bolta aur dahena haath fareb deta hai.
9ai allaah, main teree tamjeed men naya geet gaaoonga, das taaron ka sitaar baja kar teree madahsaraaee karoonga.
10kyoonki too baadshaahon ko najaat deta aur apnay khaadim daaood ko muhalak talvaar say bachaata hai.
11mujhay chhuda kar pardesiyon kay haath say bacha, jin ka munh jhoot bolta aur dahena haath fareb deta hai.
12hamaaray betay javaanee men phalnay phoolnay vaalay paudon kee maanind hon, hamaaree betiyaan mahel ko sajaanay kay liyay taraashay huay konay kay satoon kee maanind hon.
13hamaaray godaam bharay rahen aur har qism kee khuraak muhayya karen. hamaaree bhed-bakriyaan hamaaray maidaanon men hazaaron balki beshumaar bachchay janm den.
14hamaaray gaay-bail motay-taazay hon, aur na koee zaaay ho jaaay, na kisee ko nuqsaan pahunchay. hamaaray chaukon men aah-o-zaaree kee aavaaz sunaaee na day.
15mubaarak hai vah qaum jis par yah sab kuchh saadiq aata hai, mubaarak hai vah qaum jis ka khuda rabb hai