Zaboor 145
allaah kee abdee shafqat
1daaood ka zaboor. hamd-o-sana ka geet.
ai meray khuda, main teree taazeem karoonga. ai baadshaah, main hamesha tak teray naam kee sitaaish karoonga.
2rozaana main teree tamjeed karoonga, hamesha tak teray naam kee hamd karoonga.
3rabb azeem aur badee taareef kay laaiq hai. us kee azmat insaan kee samajh say baahar hai.
4ek pusht aglee pusht kay saamnay vah kuchh saraahay jo too nay kiya hai, vah doosron ko teray zabardast kaam sunaaen.
5main teray shaandaar jalaal kee azmat aur teray mojizon men mahev-ay-khayaal rahoonga.
6log teray haibtanaak kaamon kee qudrat pesh karen, aur main bhee teree azmat bayaan karoonga.
7vah josh say teree badee bhalaaee ko saraahen aur khushee say teree raastee kee madahsaraaee karen.
8rabb meharbaan aur raheem hai. vah tahemmul aur shafqat say bharpoor hai.
9rabb sab kay saath bhalaaee karta hai, vah apnee tamaam makhlooqaat par rahem karta hai.
10ai rabb, teree tamaam makhlooqaat tera shukr karen. teray eemaandaar teree tamjeed karen.
11vah teree baadshaahee kay jalaal par fakhar karen aur teree qudrat bayaan karen
12taaki aadamzaad teray qavee kaamon aur teree baadshaahee kee jalaalee shaan-o-shaukat say aagaah ho jaaen.
13teree baadshaahee kee koee intiha naheen, aur teree saltanat pusht-dar-pusht hamesha tak qaaim rahegee.
14rabb tamaam girnay vaalon ka sahaara hai. jo bhee dab jaaay usay vah utha khada karta hai.
15sab kee aankhen teray intizaar men rahetee hain, aur too har ek ko vaqt par us ka khaana muhayya karta hai.
16too apnee mutthee khol kar har jaandaar kee khwaahish pooree karta hai.
17rabb apnee tamaam raahon men raast aur apnay tamaam kaamon men vafaadaar hai.
18rabb un sab kay qareeb hai jo usay pukaartay hain, jo diyaanatdaaree say usay pukaartay hain.
19jo us ka khauf maanen un kee aarzoo vah pooree karta hai. vah un kee faryaaden sun kar un kee madad karta hai.
20rabb un sab ko mahfooz rakhta hai jo usay piyaar kartay hain, lekin bedeenon ko vah halaak karta hai.
21mera munh rabb kee taareef bayaan karay, tamaam makhlooqaat hamesha tak us kay muqaddas naam kee sitaaish karen.