Zaboor 147

kaainaat aur taareekh men rabb ka band-o-bast

¹rabb kee hamd ho! apnay khuda kee madahsaraaee karna kitna bhala hai, us kee tamjeed karna kitna piyaara aur khoobsoorat hai.

²rabb yarooshalam ko taameer karta aur israaeel kay muntashir jilaavatanon ko jama karta hai.

³vah dilashikaston ko shifa day kar un kay zakhmon par marham-pattee lagaata hai.

⁴vah sitaaron kee taadaad gin leta aur har ek ka naam lay kar unhen bulaata hai.

⁵hamaara rabb azeem hai, aur us kee qudrat zabardast hai. us kee hikmat kee koee intiha naheen.

⁶rabb museebatazadon ko utha khada karta lekin badkaaron ko khaak men mila deta hai.

⁷rabb kee tamjeed men shukr ka geet gaao, hamaaray khuda kee khushee men sarod bajaao.

⁸kyoonki vah aasmaan par baadal chhaanay deta, zameen ko baarish muhayya karta aur pahaadon par ghaas phootnay deta hai.

⁹vah maveshee ko chaara aur kavvay kay bachchon ko vah kuchh khilaata hai jo vah shor macha kar maangtay hain.

¹⁰na vah ghoday kee taaqat say lutf’andoz hota, na aadmee kee mazboot taangon say khush hota hai.

¹¹rabb un hee say khush hota hai jo us ka khauf maantay aur us kee shafqat kay intizaar men rahetay hain.

¹²ai yarooshalam, rabb kee madahsaraaee kar! ai siyyoon, apnay khuda kee hamd kar!

¹³kyoonki us nay teray darvaazon kay kunday mazboot karkay teray darmiyaan basnay vaalee aulaad ko barkat dee hai.

¹⁴vahee teray ilaaqay men amn aur sukoon qaaim rakhta aur tujhay behtareen gandum say ser karta hai.

¹⁵vah apna farmaan zameen par bhejta hai to us ka kalaam tezee say pahunchta hai.

¹⁶vah oon jaisee barf muhayya karta aur paala raakh kee tarah chaaron taraf bikher deta hai.

¹⁷vah apnay olay kankaron kee tarah zameen par phaink deta hai. kaun us kee shadeed sardee bardaasht kar sakta hai?

¹⁸vah ek baar phir apna farmaan bhejta hai to barf pighal jaatee hai. vah apnee hava chalnay deta hai to paanee tapaknay lagta hai.

¹⁹us nay yaaqoob ko apna kalaam sunaaya, israaeel par apnay ahkaam aur aaeen zaahir kiay hain.

²⁰aisa sulook us nay kisee aur qaum say naheen kiya. deegar aqvaam to teray ahkaam naheen jaanteen. rabb kee hamd ho