Zaboor 16
etimaad kee duaa
1daaood ka ek sunahera zaboor.
ai allaah, mujhay mahfooz rakh, kyoonki tujh men main panaah leta hoon.
2main nay rabb say kaha, “too mera aaqa hai, too hee meree khushhaalee ka vaahid sarchashma hai.”
3mulk men jo muqaddaseen hain vahee meray soormay hain, un hee ko main pasand karta hoon.
4lekin jo deegar maaboodon kay peechhay bhaagay rahetay hain un kee takleef badhtee jaaegee. na main un kee khoon kee qurbaaniyon ko pesh karoonga, na un kay naamon ka zikr tak karoonga.
5ai rabb, too meree meeraas aur mera hissa hai. mera naseeb teray haath men hai.
6jab qur’a daala gaya to mujhay khushgavaar zameen mil gaee. yaqeenan meree meeraas mujhay bahut pasand hai.
7main rabb kee sitaaish karoonga jis nay mujhay mashvra diya hai. raat ko bhee mera dil meree hidaayat karta hai.
8rabb har vaqt meree aankhon kay saamnay raheta hai. vah meray dahenay haath raheta hai, is liyay main naheen dagmagaaoonga.
9is liyay mera dil shaadmaan hai, meree jaan khushee kay naaray lagaatee hai. haan, mera badan pursukoon zindagee guzaarega.
10kyoonki too meree jaan ko paataal men naheen chhodega, aur na apnay muqaddas ko galnay sadnay kee naubat tak pahunchnay dega.
11too mujhay zindagee kee raah say aagaah karta hai. teray huzoor say bharpoor khushiyaan, teray dahenay haath say abdee masarraten haasil hotee hain.