Zaboor 17

begunaah shakhs kee duaa

¹daaood kee dua.

ai rabb, insaaf kay liyay meree faryaad sun, meree aah-o-zaaree par dhyaan day. meree dua par ghaur kar, kyoonki vah farebdih honton say naheen nikaltee.

²teray huzoor mera insaaf kiya jaaay, teree aankhen un baaton ka mushaahada karen jo sachch hain.

³too nay meray dil ko jaanch liya, raat ko mera muaaina kiya hai. too nay mujhay bhattee men daal diya taaki naapaak cheezen door karay, go aisee koee cheez naheen milee. kyoonki main nay poora iraada kar liya hai ki meray munh say buree baat naheen niklegee.

⁴jo kuchh bhee doosray kartay hain main nay khud teray munh kay farmaan kay taabay rah kar apnay aap ko zaalimon kee raahon say door rakha hai.

⁵main qadam-ba-qadam teree raahon men raha, meray paaon kabhee na dagamagaaay.

⁶ai allaah, main tujhay pukaarta hoon, kyoonki too meree sunega. kaan laga kar meree dua ko sun.

⁷too jo apnay dahenay haath say unhen rihaaee deta hai jo apnay mukhaalifon say tujh men panaah letay hain, mojizaana taur par apnee shafqat ka izhaar kar.

⁸aankh kee putlee kee tarah meree hifaazat kar, apnay paron kay saay men mujhay chhupa lay.

⁹un bedeenon say mujhay mahfooz rakh jo mujh par tabaahakun hamlay kar rahay hain, un dushmanon say jo mujhay gher kar maar daalnay kee koshish kar rahay hain.

¹⁰vah sarkash ho gaay hain, un kay munh ghamand kee baaten kartay hain.

¹¹jidhar bhee ham qadam uthaaen vahaan vah bhee pahunch jaatay hain. ab unhon nay hamen gher liya hai, vah ghoor ghoor kar hamen zameen par patakhnay ka mauqa dhoond rahay hain.

¹²vah us sherbabar kee maanind hain jo shikaar ko phaadnay kay liyay tadapta hai, us javaan sher kee maanind jo taak men baitha hai.

¹³ai rabb, uth aur un ka saamna kar, unhen zameen par patakh day! apnee talvaar say meree jaan ko bedeenon say bacha.

¹⁴ai rabb, apnay haath say mujhay in say chhutkaara day. unhen to is duniya men apna hissa mil chuka hai. kyoonki too nay un kay pet ko apnay maal say bhar diya, balki un kay betay bhee ser ho gaay hain aur itna baaqee hai ki vah apnee aulaad kay liyay bhee kaafee kuchh chhod jaaengay.

¹⁵lekin main khud raastbaaz saabit ho kar teray chiharay ka mushaahada karoonga, main jaag kar teree soorat say ser ho jaaoonga.