Zaboor 18

daaood ka fatah ka geet

¹rabb kay khaadim daaood ka zaboor. mooseeqee kay raahanuma kay liyay. daaood nay rabb kay liyay yah geet gaaya jab rabb nay usay tamaam dushmanon aur saaool say bachaaya. vah bola,

ai rabb meree quvvat, main tujhay piyaar karta hoon.

²rabb meree chataan, mera qil’a aur mera najaatadihanda hai. mera khuda meree chataan hai jis men main panaah leta hoon. vah meree dhaal, meree najaat ka pahaad, mera buland hisaar hai.

³main rabb ko pukaarta hoon, us kee tamjeed ho! tab vah mujhay dushmanon say chhutkaara deta hai.

⁴maut kay rasson nay mujhay gher liya, halaakat kay sailaab nay meray dil par dahshat taaree kee.

⁵paataal kay rasson nay mujhay jakad liya, maut nay meray raastay men apnay phanday daal diay.

⁶jab main museebat men phans gaya to main nay rabb ko pukaara. main nay madad kay liyay apnay khuda say faryaad kee to us nay apnee sukoonatgaah say meree aavaaz sunee, meree cheekhen us kay kaan tak pahunch gaeen.

⁷tab zameen laraz uthee aur thartharaanay lagee, pahaadon kee bunyaaden rabb kay ghazab kay saamnay kaampnay aur jhoolnay lageen.

⁸us kee naak say dhuaan nikal aaya, us kay munh say bhasm karnay vaalay sholay aur dahektay koilay bhadak uthay.

⁹aasmaan ko jhuka kar vah naazil hua. jab utar aaya to us kay paaon kay neechay andhera hee andhera tha.

¹⁰vah karoobee farishtay par savaar hua aur ud kar hava kay paron par mandalaanay laga.

¹¹us nay andheray ko apnee chhupnay kee jagah banaaya, baarish kay kaalay aur ghanay baadal khaimay kee tarah apnay girdaagird lagaaay.

¹²us kay huzoor kee tez raushnee say us kay baadal olay aur sholaazan koilay lay kar nikal aaay.

¹³rabb aasmaan say kadaknay laga, allaah t’aala kee aavaaz goonj uthee. tab olay aur sholaazan koilay barasnay lagay.

¹⁴us nay apnay teer chalaaay to dushman tittar-bittar ho gaay. us kee tez bijlee idhar udhar girtee gaee to un men halchal mach gaee.

¹⁵ai rabb, too nay daanta to samundar kee vaadiyaan zaahir hueen, jab too ghussay men garja to teray dam kay jhonkon say zameen kee bunyaaden nazar aaeen.

¹⁶bulandiyon par say apna haath badha kar us nay mujhay pakad liya, mujhay gaheray paanee men say khainch kar nikaal laaya.

¹⁷us nay mujhay meray zabardast dushman say bachaaya, un say jo mujh say nafrat kartay hain, jin par main ghaalib na a saka.

¹⁸jis din main museebat men phans gaya us din unhon nay mujh par hamla kiya, lekin rabb mera sahaara bana raha.

¹⁹us nay mujhay tang jagah say nikaal kar chhutkaara diya, kyoonki vah mujh say khush tha.

²⁰rabb mujhay meree raastbaazee ka ajr deta hai. meray haath saaf hain, is liyay vah mujhay barkat deta hai.

²¹kyoonki main rabb kee raahon par chalta raha hoon, main badee karnay say apnay khuda say door naheen hua.

²²us kay tamaam ahkaam meray saamnay rahay hain, main nay us kay farmaanon ko radd naheen kiya.

²³us kay saamnay hee main beilzaam raha, gunaah karnay say baaz raha hoon.

²⁴is liyay rabb nay mujhay meree raastbaazee ka ajr diya, kyoonki us kee aankhon kay saamnay hee men paak-saaf saabit hua.

²⁵ai allaah, jo vafaadaar hai us kay saath tera sulook vafaadaaree ka hai, jo beilzaam hai us kay saath tera sulook beilzaam hai.

²⁶jo paak hai us kay saath tera sulook paak hai. lekin jo kajrau hai us kay saath tera sulook bhee kajarvee ka hai.

²⁷kyoonki too pastahaalon ko najaat deta aur maghroor aankhon ko past karta hai.

²⁸ai rabb, too hee mera charaagh jalaata, mera khuda hee meray andheray ko raushan karta hai.

²⁹kyoonki teray saath main faujee dastay par hamla kar sakta, apnay khuda kay saath deevaar ko phalaang sakta hoon.

³⁰allaah kee raah kaamil hai, rabb ka farmaan khaalis hai. jo bhee us men panaah lay us kee vah dhaal hai.

³¹kyoonki rabb kay siva kaun khuda hai? hamaaray khuda kay siva kaun chataan hai?

³²allaah mujhay quvvat say kamarbasta karta, vah meree raah ko kaamil kar deta hai.

³³vah meray paaon ko hiran kee see phurtee ata karta, mujhay mazbootee say meree bulandiyon par khada karta hai.

³⁴vah meray haathon ko jang karnay kee tarbiyat deta hai. ab meray baazoo peetal kee kamaan ko bhee taan letay hain.

³⁵ai rabb, too nay mujhay apnee najaat kee dhaal bakhsh dee hai. teray dahenay haath nay mujhay qaaim rakha, teree narmee nay mujhay bada bana diya hai.

³⁶too meray qadmon kay liyay raasta bana deta hai, is liyay meray takhnay naheen dagmagaatay.

³⁷main nay apnay dushmanon ka taaqqub karkay unhen pakad liya, main baaz na aaya jab tak vah khatm na ho gaay.

³⁸main nay unhen yoon paash paash kar diya ki dubaara uth na sakay balki gir kar meray paaon talay paday rahay.

³⁹kyoonki too nay mujhay jang karnay kay liyay quvvat say kamarbasta kar diya, too nay meray mukhaalifon ko meray saamnay jhuka diya.

⁴⁰too nay meray dushmanon ko meray saamnay say bhaga diya, aur main nay nafrat karnay vaalon ko tabaah kar diya.

⁴¹vah madad kay liyay cheekhtay chillaatay rahay, lekin bachaanay vaala koee naheen tha. vah rabb ko pukaartay rahay, lekin us nay javaab na diya.

⁴²main nay unhen choor choor karkay gard kee tarah hava men uda diya. main nay unhen kachray kee tarah galee men phaink diya.

⁴³too nay mujhay qaum kay jhagdon say bacha kar aqvaam ka sardaar bana diya hai. jis qaum say main naavaaqif tha vah meree khidmat kartee hai.

⁴⁴joon hee main baat karta hoon to log meree suntay hain. pardesee dabak kar meree khushaamad kartay hain.

⁴⁵vah himmat haar kar kaamptay huay apnay qilaon say nikal aatay hain.

⁴⁶rabb zinda hai! meree chataan kee tamjeed ho! meree najaat kay khuda kee taazeem ho!

⁴⁷vahee khuda hai jo mera intiqaam leta, aqvaam ko meray taabay kar detaa

⁴⁸aur mujhay meray dushmanon say chhutkaara deta hai. yaqeenan too mujhay meray mukhaalifon par sarfaraaz karta, mujhay zaalimon say bachaaay rakhta hai.

⁴⁹ai rabb, is liyay main aqvaam men teree hamd-o-sana karoonga, teray naam kee taareef men geet gaaoonga.

⁵⁰kyoonki rabb apnay baadshaah ko badee najaat deta hai, vah apnay masah kiay huay baadshaah daaood aur us kee aulaad par hamesha tak meharbaan rahega.