Zaboor 19

makhlooqaat men allaah ka jalaal

¹daaood ka zaboor. mooseeqee kay raahanuma kay liyay.

aasmaan allaah kay jalaal ka elaan kartay hain, aasmaanee gumbad us kay haathon ka kaam bayaan karta hai.

²ek din doosray ko ittila deta, ek raat doosree ko khabar pahunchaatee hai,

³lekin zabaan say naheen. go un kee aavaaz sunaaee naheen detee,

⁴to bhee un kee aavaaz nikal kar pooree duniya men sunaaee detee, un kay alfaaz duniya kee intiha tak pahunch jaatay hain. vahaan allaah nay aaftaab kay liyay khaima lagaaya hai.

⁵jis tarah doolha apnee khwaabgaah say nikalta hai usee tarah sooraj nikal kar pahelavaan kee tarah apnee daud daudnay par khushee manaata hai.

⁶aasmaan kay ek siray say chadh kar us ka chakkar doosray siray tak lagta hai. us kee taptee garmee say koee bhee cheez posheeda naheen rahetee.

⁷rabb kee shareeat kaamil hai, us say jaan men jaan a jaatee hai. rabb kay ahkaam qaabil-ay-etimaad hain, un say saadaalauh daanishmand ho jaata hai.

⁸rabb kee hidaayaat ba-insaaf hain, un say dil baagh baagh ho jaata hai. rabb kay ahkaam paak hain, un say aankhen chamak uthtee hain.

⁹rabb ka khauf paak hai aur abad tak qaaim rahega. rabb kay farmaan sachchay aur sab kay sab raast hain.

¹⁰vah sonay balki khaalis sonay kay dher say ziyaada marghoob hain. vah shahed balki chhattay kay taaza shahed say ziyaada meethay hain.

¹¹un say teray khaadim ko aagaah kiya jaata hai, un par amal karnay say bada ajr milta hai.

¹²jo khataaen bekhabree men sarzad hueen kaun unhen jaanta hai? meray posheeda gunaahon ko muaaf kar!

¹³apnay khaadim ko gustaakhon say mahfooz rakh taaki vah mujh par hukoomat na karen. tab main beilzaam ho kar sangeen gunaah say paak rahoonga.

¹⁴ai rabb, bakhsh day ki meray munh kee baaten aur meray dil kee soch-bichaar tujhay pasand aaay. too hee meree chataan aur mera chhudaanay vaala hai.