Zaboor 2

allaah ka maseeh

¹aqvaam kyoon taish men a gaee hain? ummaten kyoon bekaar saazishen kar rahee hain?

²duniya kay baadshaah uth khaday huay, hukmaraan rabb aur us kay maseeh kay khilaaf jama ho gaay hain.

³vah kahetay hain, “aao, ham un kee zanjeeron ko tod kar aazaad ho jaaen, un kay rasson ko door tak phaink den.”

⁴lekin jo aasmaan par takhtnasheen hai vah hansta hai, rabb un ka mazaaq udaata hai.

⁵phir vah ghussay say unhen daantta, apna shadeed ghazab un par naazil karkay unhen daraata hai.

⁶vah farmaata hai, “main nay khud apnay baadshaah ko apnay muqaddas pahaad siyyoon par muqarrar kiya hai!”

⁷aao, main rabb ka farmaan sunaaoon. us nay mujh say kaha, “too mera beta hai, aaj main tera baap ban gaya hoon.

⁸mujh say maang to main tujhay meeraas men tamaam aqvaam ata karoonga, duniya kee intiha tak sab kuchh bakhsh doonga.

⁹too unhen lohay kay shaahee asa say paash paash karega, unhen mittee kay bartanon kee tarah chikna-choor karega.”

¹⁰chunaanchay ai baadshaaho, samajh say kaam lo! ai duniya kay hukmraano, tarbiyat qabool karo!

¹¹khauf kartay huay rabb kee khidmat karo, laraztay huay khushee manaao.

¹²betay ko bosa do, aisa na ho ki vah ghussay ho jaaay aur tum raastay men hee halaak ho jaao. kyoonki vah ek dam taish men a jaata hai. mubaarak hain vah sab jo us men panaah letay hain.