Zaboor 20

fatah kay liyay duaa

¹daaood ka zaboor. mooseeqee kay raahanuma kay liyay.

museebat kay din rabb teree sunay, yaaqoob kay khuda ka naam tujhay mahfooz rakhay.

²vah maqdis say teree madad bhejay, vah siyyoon say tera sahaara banay.

³vah teree ghalla kee nazren yaad karay, teree bhasm honay vaalee qurbaaniyaan qabool farmaaay. (silaah)

⁴vah teray dil kee aarzoo pooree karay, teray tamaam mansoobon ko kaamyaabee bakhshay.

⁵tab ham teree najaat kee khushee manaaengay, ham apnay khuda kay naam men fatah ka jhanda gaadengay. rabb teree tamaam guzaarishen pooree karay.

⁶ab main nay jaan liya hai ki rabb apnay masah kiay huay baadshaah kee madad karta hai. vah apnay muqaddas aasmaan say us kee sun kar apnay dahenay haath kee qudrat say usay chhutkaara dega.

⁷baaz apnay rathon par, baaz apnay ghodon par fakhar kartay hain, lekin ham rabb apnay khuda kay naam par fakhar karengay.

⁸hamaaray dushman jhuk kar gir jaaengay, lekin ham uth kar mazbootee say khaday rahengay.

⁹ai rabb, hamaaree madad farma! baadshaah hamaaree sunay jab ham madad kay liyay pukaaren.