Zaboor 21

baadshaah kay liyay allaah kee madad

¹daaood ka zaboor. mooseeqee kay raahanuma kay liyay.

ai rabb, baadshaah teree quvvat dekh kar shaadmaan hai, vah teree najaat kee kitnee badee khushee manaata hai.

²too nay us kee dilee khwaahish pooree kee aur inkaar na kiya jab us kee aarzoo nay honton par alfaaz ka roop dhaara. (silaah)

³kyoonki too achchhee achchhee barkaten apnay saath lay kar us say milnay aaya, too nay usay khaalis sonay ka taaj pahenaaya.

⁴us nay tujh say zindagee paanay kee aarzoo kee to too nay usay umr kee daraazee bakhshee, mazeed itnay din ki un kee intiha naheen.

⁵teree najaat say usay badee izzat haasil huee, too nay usay shaan-o-shaukat say aaraasta kiya.

⁶kyoonki too usay abad tak barkat deta, usay apnay chiharay kay huzoor la kar nihaayat khush kar deta hai.

⁷kyoonki baadshaah rabb par etimaad karta hai, allaah t’aala kee shafqat usay dagmagaanay say bachaaegee.

⁸teray dushman teray qabzay men a jaaengay, jo tujh say nafrat kartay hain unhen tera dahena haath pakad lega.

⁹jab too un par zaahir hoga to vah bhadaktee bhattee kee see museebat men phans jaaengay. rabb apnay ghazab men unhen hadap kar lega, aur aag unhen kha jaaegee.

¹⁰too un kee aulaad ko roo-ay-zameen par say mita daalega, insaanon men un ka naam-o-nishaan tak naheen rahega.

¹¹go vah teray khilaaf saazishen kartay hain to bhee un kay buray mansoobay naakaam rahengay.

¹²kyoonki too unhen bhaga kar un kay chiharon ko apnay teeron ka nishaana bana dega.

¹³ai rabb, uth aur apnee qudrat ka izhaar kar taaki ham teree qudrat kee tamjeed men saaz baja kar geet gaaen.