Zaboor 23

achchha charvaahaa

¹daaood ka zaboor.

rabb mera charvaaha hai, mujhay kamee na hogee.

²vah mujhay shaadaab charaagaahon men charaata aur pursukoon chashmon kay paas lay jaata hai.

³vah meree jaan ko taazaadam karta aur apnay naam kee khaatir raastee kee raahon par meree qiyaadat karta hai.

⁴go main taareektareen vaadee men say guzroon main museebat say naheen daroonga, kyoonki too meray saath hai, teree laathee aur tera asa mujhay tasallee detay hain.

⁵too meray dushmanon kay roo-ba-roo meray saamnay mez bichha kar meray sar ko tel say tar-o-taaza karta hai. mera piyaala teree barkat say chhalak uthta hai.

⁶yaqeenan bhalaaee aur shafqat umr bhar meray saath saath rahengee, aur main jeetay jee rabb kay ghar men sukoonat karoonga.