Zaboor 24

baadshaah ka istiqbaal

¹daaood ka zaboor.

zameen aur jo kuchh us par hai rabb ka hai, duniya aur us kay baashinday usee kay hain. ²kyoonki us nay zameen kee bunyaad samundaron par rakhee aur usay daryaaon par qaaim kiya.

³kis ko rabb kay pahaad par chadhnay kee ijaazat hai? kaun us kay muqaddas maqaam men khada ho sakta hai?

⁴vah jis kay haath paak aur dil saaf hain, jo na fareb ka iraada rakhta, na qasam kha kar jhoot bolta hai.

⁵vah rabb say barkat paaega, usay apnee najaat kay khuda say raastee milegee.

⁶yah hoga un logon ka haal jo allaah kee marzee darayaaft kartay, jo teray chiharay kay taalib hotay hain, ai yaaqoob kay khuda. (silaah)

⁷ai phaatko, khul jaao! ai qadeem darvaazo, pooray taur par khul jaao taaki jalaal ka baadshaah daakhil ho jaaay.

⁸jalaal ka baadshaah kaun hai? rabb jo qavee aur qaadir hai, rabb jo jang men zoraavar hai.

⁹ai phaatko, khul jaao! ai qadeem darvaazo, pooray taur par khul jaao taaki jalaal ka baadshaah daakhil ho jaaay.

¹⁰jalaal ka baadshaah kaun hai? rabb-ul-afwaaj, vahee jalaal ka baadshaah hai. (silaah