Zaboor 25
muaafee aur raahanumaaee kay liyay duaa
1daaood ka zaboor.
ai rabb, main tera aarzoomand hoon.
2ai meray khuda, tujh par main bharosa rakhta hoon. mujhay sharminda na honay day ki meray dushman mujh par shaadiyaana bajaaen.
3kyoonki jo bhee tujh par ummeed rakhay vah sharminda naheen hoga jabki jo bilaavajah bevafa hotay hain vahee sharminda ho jaaengay.
4ai rabb, apnee raahen mujhay dikha, mujhay apnay raaston kee taaleem day.
5apnee sachchaaee kay mutaabiq meree raahanumaaee kar, mujhay taaleem day. kyoonki too meree najaat ka khuda hai. din bhar main teray intizaar men raheta hoon.
6ai rabb, apna vah rahem aur meharbaanee yaad kar jo too qadeem zamaanay say karta aaya hai.
7ai rabb, meree javaanee kay gunaahon aur meree bevafa harkaton ko yaad na kar balki apnee bhalaaee kee khaatir aur apnee shafqat kay mutaabiq mera khayaal rakh.
8rabb bhala aur aadil hai, is liyay vah gunaahgaaron ko saheeh raah par chalnay kee talqeen karta hai.
9vah farotanon kee insaaf kee raah par raahanumaaee karta, haleemon ko apnee raah kee taaleem deta hai.
10jo rabb kay ahd aur ahkaam kay mutaabiq zindagee guzaaren unhen rabb meharbaanee aur vafaadaaree kee raahon par lay chalta hai.
11ai rabb, mera qusoor sangeen hai, lekin apnay naam kee khaatir usay muaaf kar.
12rabb ka khauf maannay vaala kahaan hai? rabb khud usay us raah kee taaleem dega jo usay chunna hai.
13tab vah khushhaal rahega, aur us kee aulaad mulk ko meeraas men paaegee.
14jo rabb ka khauf maanen unhen vah apnay hamraaz bana kar apnay ahd kee taaleem deta hai.
15meree aankhen rabb ko taktee rahetee hain, kyoonki vahee meray paaon ko jaal say nikaal leta hai.
16meree taraf maail ho ja, mujh par meharbaanee kar! kyoonki main tanha aur museebatzada hoon.
17meray dil kee pareshaaniyaan door kar, mujhay meree takaaleef say rihaaee day.
18meree museebat aur tangee par nazar daal kar meree khataaon ko muaaf kar.
19dekh, meray dushman kitnay ziyaada hain, vah kitna zulm karkay mujh say nafrat kartay hain.
20meree jaan ko mahfooz rakh, mujhay bacha! mujhay sharminda na honay day, kyoonki main tujh men panaah leta hoon.
21begunaahee aur diyaanatdaaree meree paheraadaaree karen, kyoonki main teray intizaar men raheta hoon.
22ai allaah, fidya day kar israaeel ko us kee tamaam takaaleef say aazaad kar