Zaboor 26
begunaah ka iqraar aur iltijaa
1daaood ka zaboor.
ai rabb, mera insaaf kar, kyoonki mera chaal-chalan bequsoor hai. main nay rabb par bharosa rakha hai, aur main daanvaandol naheen ho jaaoonga.
2ai rabb, mujhay jaanch lay, mujhay aazma kar dil kee tah tak mera muaaina kar.
3kyoonki teree shafqat meree aankhon kay saamnay rahee hai, main teree sachchee raah par chalta raha hoon.
4na main dhokebaazon kee majlis men baithta, na chaalaak logon say rifaaqat rakhta hoon.
5mujhay shareeron kay ijatimaaon say nafrat hai, bedeenon kay saath main baithta bhee naheen.
6ai rabb, main apnay haath dho kar apnee begunaahee ka izhaar karta hoon. main teree qurbaangaah kay gird phir kar
7buland aavaaz say teree hamd-o-sana karta, teray tamaam mojizaat ka elaan karta hoon.
8ai rabb, teree sukoonatgaah mujhay piyaaree hai, jis jagah tera jalaal thaherta hai vah mujhay azeez hai.
9meree jaan ko mujh say chheen kar mujhay gunaahgaaron men shaamil na kar! meree zindagee ko mita kar mujhay khoonkhwaaron men shumaar na kar,
10aisay logon men jin kay haath sharmanaak harkaton say aalooda hain, jo har vaqt rishvat khaatay hain.
11kyoonki main begunaah zindagee guzaarta hoon. fidya day kar mujhay chhutkaara day! mujh par meharbaanee kar!
12meray paaon hamvaar zameen par qaaim ho gaay hain, aur main ijatimaaon men rabb kee sitaaish karoonga.