Zaboor 28

madad kay liyay dua aur javaab kay liyay shukrguzaaree

¹daaood ka zaboor.

ai rabb, main tujhay pukaarta hoon. ai meree chataan, khaamoshee say apna munh mujh say na pher. kyoonki agar too chup rahay to main maut kay gadhay men utarnay vaalon kee maanind ho jaaoonga.

²meree iltijaaen sun jab main cheekhtay chillaatay tujh say madad maangta hoon, jab main apnay haath teree sukoonatgaah kay muqaddastareen kamray kee taraf uthaata hoon.

³mujhay un bedeenon kay saath ghaseet kar saza na day jo ghalat kaam kartay hain, jo apnay padosiyon say bazaahir dostaana baaten kartay, lekin dil men un kay khilaaf buray mansoobay baandhtay hain.

⁴unhen un kee harkaton aur buray kaamon ka badla day. jo kuchh un kay haathon say sarzad hua hai us kee pooree saza day. unhen utna hee nuqsaan pahuncha day jitna unhon nay doosron ko pahunchaaya hai.

⁵kyoonki na vah rabb kay aamaal par, na us kay haathon kay kaam par tavajjuh detay hain. allaah unhen dha dega aur dubaara kabhee taameer naheen karega.

⁶rabb kee tamjeed ho, kyoonki us nay meree iltija sun lee.

⁷rabb meree quvvat aur meree dhaal hai. us par meray dil nay bharosa rakha, us say mujhay madad milee hai. mera dil shaadiyaana bajaata hai, main geet ga kar us kee sitaaish karta hoon.

⁸rabb apnee qaum kee quvvat aur apnay masah kiay huay khaadim ka najaatabakhsh qil’a hai.

⁹ai rabb, apnee qaum ko najaat day! apnee meeraas ko barkat day! un kee gallaabaanee karkay unhen hamesha tak uthaaay rakh.