Zaboor 31
hifaazat kay liyay duaa
1daaood ka zaboor. mooseeqee kay raahanuma kay liyay.
ai rabb, main nay tujh men panaah lee hai. mujhay kabhee sharminda na honay day balki apnee raastee kay mutaabiq mujhay bacha!
2apna kaan meree taraf jhuka, jald hee mujhay chhutkaara day. chataan ka mera burj ho, pahaad ka qil’a jis men main panaah lay kar najaat pa sakoon.
3kyoonki too meree chataan, mera qil’a hai, apnay naam kee khaatir meree raahanumaaee, meree qiyaadat kar.
4mujhay us jaal say nikaal day jo mujhay pakadnay kay liyay chupkay say bichhaaya gaya hai. kyoonki too hee meree panaahgaah hai.
5main apnee rooh teray haathon men saumpta hoon. ai rabb, ai vafaadaar khuda, too nay fidya day kar mujhay chhudaaya hai!
6main un say nafrat rakhta hoon jo bekaar buton say liptay rahetay hain. main to rabb par bharosa rakhta hoon.
7main baagh baagh hoonga aur teree shafqat kee khushee manaaoonga, kyoonki too nay meree museebat dekh kar meree jaan kee pareshaanee ka khayaal kiya hai.
8too nay mujhay dushman kay havaalay naheen kiya balki meray paaon ko khulay maidaan men qaaim kar diya hai.
9ai rabb, mujh par meharbaanee kar, kyoonki main museebat men hoon. gham kay maaray meree aankhen sooj gaee hain, meree jaan aur jism gal rahay hain.
10meree zindagee dukh kee chakkee men pis rahee hai, meray saal aahen bhartay bhartay zaaay ho rahay hain. meray qusoor kee vajah say meree taaqat javaab day gaee, meree haddiyaan galnay sadnay lagee hain.
11main apnay dushmanon kay liyay mazaaq ka nishaana ban gaya hoon balki meray hamsaay bhee mujhay laan-taan kartay, meray jaannay vaalay mujh say dahshat khaatay hain. galee men jo bhee mujhay dekhay mujh say bhaag jaata hai.
12main murdon kee maanind un kee yaadadaasht say mit gaya hoon, mujhay theekray kee tarah phaink diya gaya hai.
13bahuton kee afwaahen mujh tak pahunch gaee hain, chaaron taraf say haulnaak khabren mil rahee hain. vah mil kar meray khilaaf saazishen kar rahay, mujhay qatl karnay kay mansoobay baandh rahay hain.
14lekin main ai rabb, tujh par bharosa rakhta hoon. main kaheta hoon, “too mera khuda hai!”
15meree taqdeer [a] lafzee tarjuma : meray auqaat. teray haath men hai. mujhay meray dushmanon kay haath say bacha, un say jo meray peechhay pad gaay hain.
16apnay chiharay ka noor apnay khaadim par chamka, apnee meharbaanee say mujhay najaat day.
17ai rabb, mujhay sharminda na honay day, kyoonki main nay tujhay pukaara hai. meray bajaay bedeenon kay munh kaalay ho jaaen, vah paataal men utar kar chup ho jaaen.
18un kay farebdih hont band ho jaaen, kyoonki vah takabbur aur hiqaarat say raastbaaz kay khilaaf kufr baktay hain.
19teree bhalaaee kitnee azeem hai! too usay un kay liyay tayyaar rakhta hai jo tera khauf maantay hain, usay unhen dikhaata hai jo insaanon kay saamnay say tujh men panaah letay hain.
20too unhen apnay chiharay kee aad men logon kay hamlon say chhupa leta, unhen khaimay men la kar ilzaamataraash zabaanon say mahfooz rakhta hai.
21rabb kee tamjeed ho, kyoonki jab shaher ka muhaasara ho raha tha to us nay mojizaana taur par mujh par meharbaanee kee.
22us vaqt main ghabra kar bola, “haay, main teray huzoor say munqatay ho gaya hoon!” lekin jab main nay cheekhtay chillaatay huay tujh say madad maangee to too nay meree iltija sun lee.
23ai rabb kay tamaam eemaanadaaro, us say muhabbat rakho! rabb vafaadaaron ko mahfooz rakhta, lekin maghrooron ko un kay ravayyay ka poora ajr dega.
24chunaanchay mazboot aur diler ho, tum sab jo rabb kay intizaar men ho.