Zaboor 32
muaafee kee barkat (tauba ka doosra zaboor)
1daaood ka zaboor. hikmat ka geet.
mubaarak hai vah jis kay jaraaim muaaf kiay gaay, jis kay gunaah dhaampay gaay hain.
2mubaarak hai vah jis ka gunaah rabb hisaab men naheen laaega aur jis kee rooh men fareb naheen hai.
3jab main chup raha to din bhar aahen bharnay say meree haddiyaan galnay lageen.
4kyoonki din raat main teray haath kay bojh talay pista raha, meree taaqat goya mausam-ay-garma kee jhulastee tapish men jaatee rahee. (silaah)
5tab main nay teray saamnay apna gunaah tasleem kiya, main apna gunaah chhupaanay say baaz aaya. main bola, “main rabb kay saamnay apnay jaraaim ka iqraar karoonga.” tab too nay meray gunaah ko muaaf kar diya. (silaah)
6is liyay tamaam eemaandaar us vaqt tujh say dua karen jab too mil sakta hai. yaqeenan jab bada sailaab aaay to un tak naheen pahunchega.
7too meree chhupnay kee jagah hai, too mujhay pareshaanee say mahfooz rakhta, mujhay najaat kay naghmon say gher leta hai. (silaah)
8“main tujhay taaleem doonga, tujhay vah raah dikhaaoonga jis par tujhay jaana hai. main tujhay mashvra day kar teree dekh-bhaal karoonga.
9naasamajh ghoday ya khachchar kee maanind na ho, jin par qaaboo paanay kay liyay lagaam aur dahaanay kee zaroorat hai, varna vah teray paas naheen aaengay.”
10bedeen kee mut’addid pareshaaniyaan hotee hain, lekin jo rabb par bharosa rakhay usay vah apnee shafqat say gheray rakhta hai.
11ai raastbaazo, rabb kee khushee men jashn manaao! ai tamaam diyaanatadaaro, shaadmaanee kay naaray lagaao